Аналитика
Иако тргувањето на американските берзи беше скратено минатата недела поради празникот (4 јули) – Денот на независноста, американските берзи затворија во позитивна територија. Охрабрувачките податоци за пазарот на трудот повторно ги одложија долгоочекуваните намалувања на каматните стапки.
Изминатата недела започна добро за американскиот претседател Доналд Трамп, бидејќи Конгресот го одобри неговиот буџет и промените во даночниот закон. Меѓу најголеми корисници на даночната реформа се инвеститорите и богатите поединци, бидејќи законските измени им донесоа значителни даночни олеснувања. Од друга страна, меѓу најпогодените групи се елитните универзитети, кои за прв пат ќе бидат обврзани да плаќаат посебен данок на донации, и имигрантите, кои ќе се соочат со построги услови и намалени даночни олеснувања.
Акциите на „Тесла“ пораснаа околу 5% во средата, откако производителот на електрични возила објави глобални испораки кои беа малку под најниските проценки на аналитичарите од Волстрит, но ги надминаа очекувањата за производство. „Тесла“ соопшти дека испорачала 384.122 електрични возила во вториот квартал, што е намалување во однос на очекувањата на аналитичарите од 389.407. И покрај падот од 13% на годишно ниво, испораките се зголемени во однос на првиот квартал, кога беа испорачани 336.681 возила. Бројките одразуваат стабилизирање на побарувачката и подобрена оперативна ефикасност по послабиот почеток на годината.
„Мајкрософт“ најавува нови отпуштања и инвестиции во вештачка интелигенција. Минатата недела објави планови за отпуштање на речиси 4% од својата работна сила, или околу 9.000 работни места, во обид да ги намали трошоците поради големите инвестиции во својата инфраструктура за вештачка интелигенција. Компанијата имаше околу 228.000 вработени низ целиот свет, а во мај објави отпуштања на речиси 6.000 работници, претежно во продажбата. „Мајкрософт“ исто така објави инвестиции од 80 милијарди долари за фискалната 2025 година, главно за проширување на инфраструктурата. Отпуштањата се знак дека маржите веројатно се под притисок.
Според Бирото за статистика на труд во САД, американската економија во јуни додаде 147.000 нови работни места надвор од земјоделството, што е над очекувањата на аналитичарите од 120.000. Стапката на невработеност малку се намали на 4,1% во јуни (очекувањата беа 4,2%), додека просечната заработка по час се зголеми за 0,2%. По објавувањето на веста, веројатноста за намалување на каматната стапка во јули од страна на ФЕД падна под 5%.
Позитивни вести беа објавени и во текот на викендот од состанокот на ОПЕК+, кој ги изненади пазарите со одлуката за зголемување на дневното производство за 548.000 барели дневно во август, надминувајќи ги дури и најоптимистичките очекувања на аналитичарите. Да потсетиме дека ОПЕК веќе го зголеми производството на нафта во мај, јуни и јули за 411.000 барели. Причината за дополнителното зголемување на пумпаните количини беа стабилните глобални економски перспективи и моменталните здрави фундаменти на пазарот, кои се одразуваат во пониски залихи на нафта. И покрај геополитичката неизвесност и војната на Блискиот Исток, цените на нафтата паднаа во првата половина од годината, но поради загриженоста за затворањето на Ормутскиот теснец, цената се искачи на 75 долари за барел за краток период, а минатата недела заврши на 66 долари за барел.
