ЗАРАБОТКАТА НА ТЕСЛА подобра од очекувањата, додека Маск размислува за спојувањето на компанијата со SpaceX

Во средата, по затворањето на берзата, Tesla објави резултати за третиот квартал кои беа подобри од очекувањата, иако приходите од автомобилскиот сектор забележаа пад. Вредноста на акциите се намали за повеќе од 3% во продолженото тргување.

Еве како се покажа компанијата во споредба со проценките на аналитичарите анкетирани од LSEG: Заработка по акција: 48 центи (прилагодена) наспроти 43 центи (проценети). Приходи: 28,05 милијарди долари наспроти 27,9 милијарди долари (проценети).

Извештајот за заработката на Tesla пристигнува еден ден откако извршниот директор Илон Маск им изјави на инвеститорите, за време на кварталниот повик на SpaceX, дека би било „добра идеја“ неговите две компании да се спојат. Тој додаде дека управните одбори на двете компании формирале посебни комисии за да разговараат за можното поврзување. „Се чувствувам како да играм степ танц среде минско поле“, изјави Маск за време на повикот, одговарајќи на прашање за потенцијалното спојување.

Маск се осврна на ова прашање во своето воведно обраќање за време на повикот на Tesla, но не даде никакви дополнителни информации. „Мислам дека вчера кажав сè што требаше да се каже“, рече тој.

Според извештајот за заработката, приходите на Tesla беа малку пониски во споредба со истиот период минатата година, кога компанијата остварила продажба од 28,24 милијарди долари. Во основната дејност на Tesla – автомобилскиот сектор – приходите во кварталот се намалиле за 3% во однос на претходната година, достигнувајќи 20,56 милијарди долари. Приходите од енергетскиот сектор паднале за 16%, на 2,88 милијарди долари.

Овие падови беа компензирани со раст во секторот за услуги и други приходи на Tesla. Продажбата во овој сегмент пораснала за 33% во однос на минатата година, достигнувајќи 4,61 милијарда долари.

Како причини за послабите приходи и профити во автомобилскиот сектор, Tesla ги наведе пониските просечни продажни цени на возилата во текот на кварталот, како и тешкотиите во обезбедувањето батерии, што го оневозможило производството на доволен број возила за исполнување на натрупаните нарачки.

Нето-добивката што им припаѓа на имателите на обични акции паднала за 29%, на 787 милиони долари (или 22 центи по акција), од 1,11 милијарди долари (или 32 центи по акција) една година претходно, соопштија од Tesla. Падот на профитабилноста се должи на значителното зголемување на трошоците за хуманоидните роботи „Оптимус“ (Optimus) и други иницијативи поврзани со вештачката интелигенција. Капиталните расходи се повеќе од двојно зголемени во споредба со претходната година, достигнувајќи 3,73 милијарди долари.

Слободниот паричен тек забележа остар пад од 62 % на годишно ниво, спуштајќи се на 1,53 милијарди долари, откако во вториот квартал „Тесла“ (Tesla) забележа негативен слободен паричен тек.

(Фото: Daniel Oberhaus)