Алкалоид и Комерцијална банка доминираат во нетрговските трансфери на акции

Минатата недела биле регистрирани 14 нетрговски трансакции. Без берзанско тргување нов сопственик добиле 1.951 обична акција, издадени од 10 друштва.

Две трансакции се извршени со акции на Алкалоид: во вторникот биле процесуирани 530, а во четвртокот 2 обични акции. Тие имаат просечна цена од 22.204,55 денари, која датира од последното тргување на 6 ноември.

Исто така, статистиката на Централниот депозитар за хартии од вредност бележи два нетрговски трансфери со акции на ОКТА: 15 во среда и 69 во четврток. Нивната просечна цена е 6.000 денари.

Во единечните нетрговски трансфери најбројни се акциите на Комерцијална банка. Евидентирани се 512 обични акции, чијашто просечна вредност е 24.481,13, произлезена од петочното берзанско тргување.

Промена на сопственоста е направена и кај 345 акции на Трготекстил малопродажба. Со акциите на ова друштво нема ниту едно тргување во изминатите 52 недели, а просечната цена е 98 денари.

Со знакот на Гранит се 258 обични акции. По последното тргување од 5 ноември, просечната вредност на градежната акција е 1.589,06 денари.

Во неделната статистика се заведени нетрговските трансфери со 74 обични акции на Тетекс Тетово, 60 на Оилко КДА, 49 на Макпетрол, 33 на Стопанска банка Скопје и 4 обични акции издадени од Фершпед.