Аналитика
Кинеските електрични возила (ЕВ) навлегуваат на канадскиот пазар по трговскиот договор што премиерот Марк Карни го договори во јануари, за време на посетата кај кинескиот претседател Си Ѓинпинг, со кој царините беа намалени од 100 % на 6,1 % за почетна годишна квота од 49.000 возила.
Дури четири кинески производители на автомобили се подготвуваат да добијат сертификати за своите модели во Канада до почетокот на следната година и се ближат кон финализирање на продажните мрежи со локалните трговци, според Тим Ројс, извршен директор на Канадската асоцијација на дилери на автомобили.
Пред оваа година, Канада наметнуваше царина од над 100 отсто за тие производи, со што практично ги исклучуваше од пазарот.
Во последните денови, стотици автомобили на Тесла (Tesla Inc.), произведени во фабриката на американскиот производител во Шангај, почнаа да пристигнуваат под новиот режим на ниски царини, според лице запознаено со ситуацијата, кое побарало анонимност бидејќи не е овластено јавно да зборува, објави Energynov.ca.
Брод за транспорт на возила наречен „Гловис трежер“ (Glovis Treasure), кој превезува и мал број луксузни автомобили од кинеската марка „Лотус“ (Lotus), е закотвен пред пристаништето во Ванкувер уште од неделата. Бродот тргнал од Шангај на почетокот на мај, според податоците за поморскиот транспорт собрани од „Блумберг“.
Договорот меѓу Канада и Кина внимателно ќе го следат американските производители на автомобили, кои историски имале доминантна позиција на канадскиот пазар. Раководни лица, вклучително и извршната директорка на „Џенерал моторс“ (General Motors Co.), Мери Бара, ја доведоа во прашање одлуката на владата на Карни да ги ублажи пречките за кинеските електрични автомобили.
Американските креатори на политики, вклучително и самиот претседател Доналд Трамп, упатија остри критики кон Карни поради склучувањето договор со Си за електрични автомобили во замена за намалување на кинеските царини за канадските земјоделски производи. Претходно оваа недела, претставничката во Претставничкиот дом Хејли Стивенс и сенаторката Елиса Слоткин — двете од Мичиген — најавија предлог за забрана на влез во САД за „кинески поврзани возила“ (возила со напредна дигитална поврзаност). Тоа би се однесувало и на возачите што ги поседуваат овие возила во Канада и во Мексико, каде што компанијата BYD и нејзините конкуренти веќе освоија значителен пазарен удел.
До неодамна, политиката на Канада кон кинеските електрични возила беше слична на онаа на САД — примена на високи царини за да се спречи нивниот увоз, став што предизвика реципрочни давачки од Пекинг за канадските земјоделски производи. Но, минатата година, претседателот Трамп воведе високи царини за странските автомобили, што резултираше со пад на производството и загуба на работни места во канадските фабрики. Притисната меѓу двата пазара, владата на Карни го преиспита својот пристап кон овој сектор. Квотата од 49.000 автомобили претставува помалку од 3 отсто од канадскиот пазар на нови возила и е слична на годишното темпо на увоз на електрични возила од кинеско производство – првенствено „Тесла“ (Tesla) – пред октомври 2024 година, кога тогашниот премиер Џастин Трудо воведе дополнителна царина од 100 отсто.
Сепак, предвидено е горната граница да се зголемува од година во година, а кинескиот сектор за електрични возила бележи силен раст, што предизвикува пореметувања на глобалните пазари на автомобили. Канадската влада очекува дека новиот трговски аранжман ќе резултира со влез на одредени кинески производители на автомобили на канадскиот пазар за првпат. Компанијата „BYD Co.“ планира отворање на околу 20 продажни места со партнери во Канада, според советник на „BYD“ кој минатиот месец разговараше со „Bloomberg News“.
Канадските власти разговараа за тоа дали да ја поделат квотата за кинески електрични возила, вклучително и дали да го ограничат уделот што секоја компанија може да го искористи, со цел ниту еден конкретен производител да не доминира во оваа мала квота. Почнувајќи од 2027 година, сè поголем дел ќе биде резервиран за возила со цена од 35.000 долари или помалку, достигнувајќи 50 отсто во 2030 година.
За време на своето обраќање во Економскиот клуб на Њујорк во четвртокот, Карни изјави дека на краток рок, се чини оти повеќето автомобили увезени во рамките на квотата ќе бидат од марката „Тесла“. Со текот на времето ќе пристигнуваат и поширок спектар на поевтини автомобили, „но на контролиран начин“, рече тој.
Канадското Министерство за надворешни работи, кое управува со тарифната квота, не одговори на барањето за коментар до моментот на објавување на веста.
Компанијата „Lotus“, која е во сопственост на „Zhejiang Geely Holding Group Co.“, на 7 мај на кинеската социјална мрежа „Weibo“ објави видео на кое се гледа како 18 автомобили од моделот „Eletre“ се товарат на брод. Цените на моделите на „Lotus“ започнуваат од 119.900 долари.
