Аналитика
Американскиот претседателот на САД, Доналд Трамп, вчера цврсто застана зад својата одлука да дозволи увоз на руски дизел, и покрај зголемените критики, нарекувајќи ја „вистински избор“ и истакнувајќи дека и Европа претходно купувала енергенси од Русија.
Во објава на социјалните мрежи во понеделникот наутро, Трамп наведе дека „Европската Унија ѝ платила на Русија 250 милијарди долари за енергенси“ и додаде: „Го направив вистинскиот избор за американскиот народ – СЕКОГАШ, АМЕРИКА НА ПРВО МЕСТО!“
Истовремено, тој објави и дека Русија и Украина се договориле да престанат со нападите врз енергетската инфраструктура на другата страна, при што ги повика двете страни да ја прекинат „апсурдната“ војна.
Изјавите на Трамп, за кои тој не даде никакви дополнителни детали, вчера дојдоа и покрај тоа што украинскиот претседател Володимир Зеленски соопшти дека руските сили нападнале најмалку шест украински енергетски објекти откако американскиот претседател во неделата го објави примирјето.
„Па, се согласија“, им рече Трамп на новинарите, мислејќи на Зеленски и на рускиот претседател Владимир Путин. „Бидејќи јас реков: ‚Вие се согласувате‘. Затоа се согласија – бидејќи јас реков дека се согласуваат.“
Кога беше притиснат со прашања за руските напади, Трамп рече: „Па, би морал да го разгледам тоа и да видам, бидејќи имаше прекршувања од двете страни.“
Разговорите за можен договор за енергетско примирје, со кој на двете земји би им се забранило да напаѓаат клучни цели на енергетската инфраструктура, се одвиваат во време кога Трамп исто така објави дека Русија веднаш ќе ги снабди САД со 300.000 тони дизел, плус 500.000 тони во ноември и 1.000.000 тони по ноемвриската испорака.
Сепак, оваа најава наиде на противење од претставници на двете партии – и од лидерите на Демократската партија и од пратениците на Републиканската партија – кои сметаат дека договорот ги поткопува санкциите од 2022 година, воведени против земјата предводена од претседателот Владимир Путин по инвазијата, за време на администрацијата на поранешниот претседател Џо Бајден.
СКАПИОТ ДИЗЕЛ И СРЕДНОРОЧНИТЕ ИЗБОРИ ВО САД
Трамп не прецизираше на кој временски период се однесува сумата од 250 милијарди долари. Проценките на Центарот за истражување на енергија и чист воздух – кој ја следи потрошувачката на ЕУ за увоз на фосилни горива од Русија од почетокот на војната со Украина – приближно се совпаѓаат со бројката што ја наведе Трамп.
Коментарите на Трамп уследија откако мала група сенатори од двете партии се спротивставија на планот на неговата администрација да ги укине санкциите за руската нафта и да увезе нови количини, во услови на нагло зголемување на цените во САД. Во изјавата дадена во неделата, сенаторите ја повикаа администрацијата да ја повлече одлуката, имајќи ја предвид тековната војна со Украина и забраната за увоз на руски енергенси.
Дизелот останува составен дел на економијата, при што сектори како транспортот, земјоделството и други се директно поврзани со ова гориво. Според податоците на Американската автомобилска асоцијација (AAA), националната просечна цена на дизелот во понеделникот изнесувала 6,2665 долари за галон. За споредба, пред една година просечната цена на дизелот на национално ниво изнесувала над 3,6 долари за галон.
Поради наглото зголемување на цените, Трамп претходно објави привремена одлука со која се дозволува продажба на дизел обоен во црвена боја (кој вообичаено се користи во градежништвото и земјоделството и е ослободен од федералниот данок за патишта) за употреба на автопатите.
