Аналитика
Црногорското приморје од следната туристичка сезона ќе биде достапно и со директен лет од Скопје. Од 1 мај 2027 година треба да започне новата авиолинија меѓу Скопје и Тиват, со првично планирани два лета неделно. Новото воздушно поврзување не е наменето само за туристите – двете држави очекуваат да ја олесни и деловната соработка, а за следната година најавуваат и заеднички бизнис-форум.
Договорот за воспоставување на линијата го соопшти вицепремиерот и министер за транспорт Александар Николоски, по разговорите со црногорскиот вицепремиер Филип Ивановиќ. Според Николоски, се реализира иницијативата за која двете страни разговарале при неговата неодамнешна посета на Црна Гора.
„Оваа авиолинија се надевам дека сериозно ќе придонесе во зголемување на бројот на патници, но и зголемување на туризмот и на бизнисот“, изјави Николоски.
Новата линија ќе создаде директна воздушна врска со еден од најпознатите туристички региони на Јадранот. Аеродромот во Тиват е влезна точка кон Бококоторскиот Залив, Котор, Будва и други туристички места на црногорското крајбрежје. За македонските туристи тоа ќе значи дополнителен избор при планирањето на летниот одмор, покрај патувањето со автомобил или автобус.
Потенцијалот на црногорскиот туризам го покажуваат и официјалните бројки. Според Управата за статистика на Црна Гора – МОНСТАТ, во 2025 година земјата регистрирала повеќе од 2,7 милиони туристички пристигнувања и 15,4 милиони ноќевања. Дури 92,6 проценти од ноќевањата биле остварени во приморските туристички места, што ја потврдува доминантната улога на крајбрежјето во туристичката понуда.
Но, дали директната линија ќе стане привлечна алтернатива за патниците, ќе зависи и од цените на билетите и распоредот на летовите. Засега не се соопштени авиокомпанијата што ќе ја оперира линијата, точните денови на сообраќање и цените, ниту дали летовите ќе бидат сезонски или ќе продолжат и по летниот период.
Покрај туризмот, двете влади гледаат можност и за зајакнување на економските врски. Николоски и Ивановиќ разговарале за организирање голем бизнис-форум во 2027 година, со директна поддршка од владите, на кој компаниите од Македонија и Црна Гора ќе можат да воспостават нови контакти и да разгледаат можности за соработка.
Воздушното поврзување меѓу двете земји беше тема и на разговорите од 9 октомври, кога црногорската Влада соопшти дека се разгледуваат можностите за линии од Скопје кон Тиват и Подгорица. За евентуалното воспоставување директна линија со црногорскиот главен град засега нема потврден датум на почеток.
