Аналитика
Вкупните депозити во март достигнаа износ од 666,4 милијарди денари, односно 10,8 милијарди евра. Проследени се со месечна стапка на раст од 1,8 насто и со годишна од 11,3 насто. Паралелно со тоа се зголемува и кредитната активност на банките – вкупно се пласирани 570,4 милијарди денари или близу 9,3 милијарди евра. Месечниот раст во овој сегмент е 1,4 насто, а годишниот 13,1 насто.
Сепак, во март има промена во однесувањето на граѓаните. Депозитите на домаќинствата паднаа за 0,4 отсто на месечно ниво. Од банкарските сметки се повлечени околу две милијарди денари (31,8 милиони евра), па мартовското салдо е 7,2 милијарди евра. Според информацијата на Народната банка, падот целосно произлегува од намалувањето на депозитните пари и краткорочните денарски депозити.
Од друга страна, депозитите на компаниите пораснаа за 7,5 насто на месечно ниво и се во износ од околу 3,2 милијарди евра. Всушност, тоа е и главната причина за вкупниот месечен раст на депозитите. Годишното зголемување на средствата на корпоративниот сектор е за 13,7 насто.
Што се однесува до задолженоста, за еден месец товарот на домаќинствата е зголемен за 1,3 насто, а вкупната сума е 4,6 милијарди евра. Годишната промена е плус 11,5 насто. Притоа, најголем удел имаат потрошувачките кредити со речиси 2,4 милијарди евра, кои имаат месечен и годишен раст од 1,2 и 10,9 насто. Следуваат станбените кредити со 1,8 милијарди евра (+1,5 %, односно +15,9 %).
Кај автомобилските кредити не е регистрирано месечна промена, но во споредба со истиот месец минатата година се зголемени за 4,2 насто. Раст има кај задолжувањето преку кредитните картички од 0,4 насто, додека на годишна основа се намалени за 3,8 отсто. Негативните салда на тековните сметки, кај кои претходно имаше извесен пад, во март пораснале за 4,6 насто, а на годишно ниво за 0,4 насто. Пониски за 1,2, односно за 12 отсто се кредитите одобрени врз други основи.
Кредитите, пак, што ги користат компаниите се исто така во износ од над 4,6 милијарди евра и бележат месечен раст од 1,5 насто и годишен раст од 15 насто.
Од Народната банка посочуваат дека паричната маса (М3) во март се зголемила за 1,7 насто, а на годишно ниво за 11,6 насто, главно како резултат на растот на депозитите.
