ЧИТАМЕ: ВОЛАС Д. ВОТЛС – НАУКА ЗА СТЕКНУВАЊЕ БОГАТСТВО | Дел 3/4

Зголемување на животот

Mора да се ослободите и од последните остатоци на старата идеја дека постои Божество чија волја е да бидете сиромашни или кому му удоволувате и служите со тоа што сте сиромашни.

Интелигентната материја која е Сè, присутна во Сè и која живее во Сè и живее во вас, е свесна жива материја. Со самото тоа што е свесна жива материја, мора да ја има природната и вродена желба на секоја жива интелигенција за зголемување на животот. Секе живо нешто постојано треба да бара проширување на својот живот, затоа што животот, при самиот чин на живеење, мора да се зголемува себеси.

Семе засадено во земја, буја во активност и во текот на сопственото живеење произведува уште стотина семиња – животот, со самото живеење, се размножува себеси. Непрестајно станува повеќе; мора да биде така за да продолжи да постои.

Интелигенцијата ја има истата потреба за постојано зголемување. Секоја мисла што ќе ја помислиме, нужно ни наметнува да помислиме друга мисла – свеста постојано се шири. Секој факт што го учиме, нè води до учење на друг факт – знаењето постојано се зголемува. Секој талент што го култивираме, ја актуелизира желбата за посветување и на друг талент – подложни сме на поривот на животот кој бара да се изрази, кој нè гони да знаеме повеќе, да правиме повеќе и да бидеме повеќе.

За да знаеме повеќе, да правиме повеќе и да бидеме повеќе мора да имаме повеќе; мора да имаме нешта за користење, бидејќи учиме, правиме и се развиваме единствено со употреба на нешта. Ние мораме да се збогатиме за да можеме да живееме повеќе.

Желбата за богатство е едноставно капацитет за поголем живот што бара да биде исполнет, секоја желба е напор на неизразена можност да се спроведе во дејство. Желбата е предизвикана од моќ која се обидува да се манифестира. Она што ве тера да сакате повеќе пари е истото она што прави растението да расте – тоа е животот кој бара поцелосен израз.

Единствената жива материја мора да е подложна на овој закон својствен за сѐ што живее – таа е проникнета со желба да живее повеќе и поради тоа ѝ е неопходно да создава ствари.

Единствената материја сака да живее повеќе во вас, па, оттука, сака да ги имате сите нешта што можете да ги користите.

Божја желба е да се збогатите. Тој сака да се збогатите, бидејќи ќе може подобро да се изрази преку вас ако имате мноштво работи што би ги употребиле за да му дадете израз. Тој може да живее повеќе во вас доколку непречено располагате со средствата за живот.

Универзумот сака да имате сè што сакате да имате.

Природата е пријателски настроена кон вашите планови.

Сè природно постои за вас.

Бидете уверени дека ова е вистина.

Меѓутоа, од суштинско значење е вашата цел да биде усогласена со целта што е во Сè.

Вие мора да посакувате вистински живот, а не само задоволство или гратификација на сетилата. Животот е извршување на функција, а поединецот навистина живее само кога тој ја исполнува секоја функција, физичка, умствена и духовна, за која е способен, без претерување во која било од нив.

Вие не посакувате да се збогатите за да живеете раскалашено, за задоволување на животинските желби – тоа не е живот. Но, извршувањето на секоја физичка функција е дел од животот и никој не живее целосно доколку им го порекнува на импулсите на телото нивниот нормален и здрав израз.

Вие не посакувате да се збогатите само за да уживате во умствените задоволства, да стекнете знаење, да ја задоволите амбицијата, да ги надминете другите, да бидете славни. Сите овие нешта се легитимен дел од животот, но човекот кој живее само за задоволствата на интелектот ќе живее само делумно живот и никогаш не ќе биде задоволен со она што го има.

Вие не посакувате да се збогатите само за доброто на другите, за да се изгубите за спасението на човештвото или за да ја искусите радоста на филантропијата и жртвувањето. Радостите на душата се само дел од животот и тие не се подобри или поблагородни од кој било друг дел.

Прочитај и: НАУКА ЗА СТЕКНУВАЊЕ БОГАТСТВО | Дел 4/4

Книгата можете да ја најдете во Книготека Икона на Максим Горки бр 17, Ул Македонија бр 24 и во ТЦ Рамстор Мол