Аналитика
Локалните власти на Крит планираат да воведат ограничувања за посета на некои од најпознатите плажи и природни атракции на западен Крит, кои последниве години страдаат од сопствената популарност. Природните убавини на Лагуната Балос, Елафониси и Фаласарна што привлекува сè поголем број посетители ја натера Општина Кисамос да побара построга контрола врз бројот на посетители, пишува Катимерини.
Лагуната Балос, Елафониси и Фаласарна се меѓу најпознатите дестинации во областа и сите се заштитени според мрежата Натура 2000 на Европската Унија поради нивната еколошка важност и богат биодиверзитет, изјави за Катимерини Јоргос Кукуракис, специјален советник за животна средина во Општина Кисамос.
Балос е спектакуларна лагуна на северозападниот врв на Крит, позната по своите плитки тиркизни води и бел и розов песок. Елафониси, на југозападниот брег на островот, е познат по својата плитка лагуна и препознатливиот розов песок, додека Фаласарна, подалеку на север на западниот брег, е долга песочна плажа зад која стојат карпести ридови.
Теренските истражувања спроведени од научници, главно од Природонаучниот музеј на Крит во Ираклио и Медитеранскиот агрономски институт во Ханија, ѝ обезбедија на општината податоци потребни за развој на специфичен акционен план, рече Кукуракис.
Една од мерките на планот е насочена кон намалување на претрупаноста со посетители на трите локации. „Имаме проблем со прекумерниот туризам во последните три или четири години. Бидејќи овие области имаат толку добра репутација, премногу луѓе одат таму“, рече Кукуракис.
Властите веќе презедоа чекори за ублажување на притисокот. На Балос, бројот на лежалки е намален на околу 150 од околу 400 пред неколку години, додека во Елафониси бројот е намален на 200 од 800, рече тој.
Елафониси последниве години стана „остров на чадори“, рече Кукуракис, тврдејќи дека намалувањето на бројот на чадори ги обесхрабрува посетителите да го поминат целиот ден таму. „Но, дури и оваа мерка не е доволна“, рече тој. „Кога треба да управувате со 4.000 до 5.000 луѓе дневно, тоа е застрашувачки“ и го отежнува спроведувањето на еколошките правила.
Еден од проблемите е посетителите што го отстрануваат песокот од плажата. На пример, во Елафониси, туристите понекогаш го носат карактеристичниот розов песок дома во тегли, и покрај фактот дека биле потребни милиони години за да се формира, рече Кукуракис.
РЕЗЕРВАЦИИ ЗА ПОСЕТА НА „РОЗОВАТА ПЛАЖА“
Според предложениот акционен план, посетителите на заштитените подрачја ќе бидат обврзани да користат онлајн платформа за да резервираат датум и време за нивната посета.
Максималниот број посетители дозволени на секое место ќе се утврди преку проценки на носивоста, рече Кукуракис. Ваквите проценки ќе утврдат колку луѓе може да смести едно подрачје без да се изврши прекумерен притисок врз неговата животна средина и инфраструктура.
Планот ќе бара соработка помеѓу Министерството за животна средина, регионалната влада на Крит и општина Кисамос. „Постои акционен план“, рече Кукуракис. „Верувам дека ќе биде готов следната година“.
