ДО ВЧЕРА СО ЧАМЕЦ, ДЕНЕС ПЕШ: Дунав драстично се повлече кај Вуковар

Дунав кај Вуковар деновиве изгледа поинаку од што локалните жители се навикнати да гледаат. Таму каде што до неодамна имало вода, сега се протегаат широки песочни површини, а Вуковарската ада, познатото речно островче спроти градот, на неколку места веќе може да се достигне пеш од српската страна.

Причината е исклучително нискиот водостој на Дунав, кој довел до големо повлекување на реката и создавање песочни спрудови. Каналот што вообичаено ја одделува адата од левиот, српски брег, на одредени делови практично исчезнал. Наместо вода, таму сега има песок, па островот визуелно и физички почнал да наликува на полуостров.

Сцената е необична и впечатлива. Просторот што со години се минувал со чамец сега на одделни места може да се помине пеш. Особено е изразена состојбата на западниот дел од адата, каде што водениот канал речиси целосно се повлекол, оставајќи зад себе голем песочен нанос кој ја поврзува со спротивниот брег.

Сепак, иако природата го промени изгледот на теренот, државната граница не исчезнала и не е поместена. Повлекувањето на водата не значи дека се менува територијалната припадност на островот, ниту дека се менува утврдената граница меѓу Хрватска и Србија.

Но, новата ситуација создава проблеми кои до неодамна речиси и не постоеле. Според хрватските медиуми, веќе бил забележан автомобил кој од српската страна стигнал до адата и се движел по неа. Фактот што сега дел од просторот е достапен без чамец отвора прашања за контролата на движењето и за потребата од поголемо присуство на полицијата.

Интересно е што ваквото сценарио било најавувано уште пред неколку месеци. Градоначалникот на Вуковар, Марјан Павличек, уште во февруари предупредил дека таложењето песок и постојаното намалување на водостојот би можеле да доведат до тоа Вуковарската ада физички да се спои со српскиот брег.

Неговото предупредување тогаш звучело како нешто што би можело да се случи во иднина. Само неколку месеци подоцна, дел од таквата слика веќе е видлив на терен.

И покрај драматичното повлекување на реката, Вуковарската ада и понатаму е едно од омилените места за летно разладување. Чамците со посетители и натаму пристигнуваат, а локалните жители велат дека во Дунав сè уште може да се плива. Но, велат и дека толку ниско ниво на реката одамна не паметат.

Вуковарската ада се наоѓа непосредно спроти Вуковар и во летниот период е едно од најпознатите излетнички и капалишни места во тој дел од Дунав. Богата е со природна сенка и ритски шуми, има песочни плажи и содржини за посетителите, а вообичаено до неа се стигнува со кратко возење со чамец.

Островот географски е поблиску до српскиот брег, од кој во нормални услови го дели тесен воден канал. Сега, со повлекувањето на реката, токму тој простор претрпе најголема промена.

Дунав така за само едно лето создаде сосема нов пејзаж кај Вуковар – вода што со години претставувала природна пречка се повлекла, песокот излегол на површина, а островот кој до вчера бил опкружен со река денес на одредени места може да се достигне со обично пешачење.