Аналитика
Индустријата за вода и безалкохолни пијалаци во 2025 година покажува поинаква, но многу интересна слика: компаниите направиле поголем промет, добивката силно пораснала, а бројот на вработени се зголемил. Истовремено, кај компаниите што исплаќаат највисоки просечни плати, платите одат нагоре.
Анализата на Пари, во соработка со Бизнис Мрежа, покажува дека кај 43 компании од овој сектор вкупниот приход во 2025 година достигнал 78,8 милиони евра. Добивката изнесувала 8,3 милиони евра, наспроти 4,9 милиони евра една година претходно, што значи дека профитот пораснал за 69,39 насто.
Пораснал и бројот на вработените. Во 2025 година во секторот работеле 828 лица, наспроти 801 лице во 2024 година. Тоа е зголемување за 27 вработени, односно раст од 3,37 насто.
Кај десетте компании што исплаќаат највисоки просечни плати во оваа дејност, просекот во 2025 година изнесувал 40.852 денари, што е за 10,19 насто повеќе во однос на 2024 година, кога просекот бил 37.074 денари.
Со други зборови, секторот растел по приход, добивка и број на вработени, а кај водечките компании по плати се гледа и јасно подобрување на просечните примања.
НАЈГОЛЕМИТЕ РАБОТОДАВАЧИ ИМААТ РАСТ НА БРОЈОТ НА ВРАБОТЕНИ
Производството на вода и безалкохолни пијалаци не е само индустрија на брендови, извори, амбалажа и дистрибуција. Тоа е и дејност што има значење за локалните заедници, особено затоа што дел од компаниите работат надвор од главниот град – во Кавадарци, Струмица, Битола, Дебарца, Куманово и други места.
Најголем работодавач во секторот е Кожувчанка од Кавадарци, со 185 вработени во 2025 година. Компанијата има раст од 8,19 насто, односно бројот на работници е зголемен од 171 на 185 лица. Тоа ја потврдува нејзината улога не само како лидер по приход, туку и како еден од најзначајните регионални работодавачи во оваа индустрија.
На второто место е Соко Горица, со 137 вработени, што е раст од 10,48 насто во однос на 2024 година, кога имала 124 вработени. Следи Магрони, со 126 вработени и минимален раст од 0,80 насто, односно само еден вработен повеќе од претходната година.
Горска исто така го зголемила бројот на вработени – од 72 на 78 лица, што претставува раст од 8,33 насто. Иноспектар од Велмеј, Дебарца, има раст од 10,34 насто, односно од 29 на 32 вработени.
Но, не вработувале сите компании од листата повеќе. Кватро од Куманово го намалила бројот на вработени од 63 на 54 лица, што е пад од 14,29 насто. Намалување има и кај Грозд од Струмица, каде што бројот на вработени се намалил од 34 на 31 лице, односно за 8,82 насто.
Кај Пелистерка бројот на вработени останал непроменет – 49 лица, исто како и претходната година. Непроменет број има и кај Визиана од Куманово, со 26 вработени, како и кај МЛ-Гари, со 25 вработени.
Гледано вкупно, секторот отворил нови работни места, но растот не е рамномерно распореден. Дел од компаниите го зголемиле бројот на вработени, дел останале стабилни, а кај неколку има намалување. Сепак, вкупната слика е позитивна – во 2025 година секторот броел 828 вработени, односно 27 повеќе од претходната година.
Извор: Бизнис Мрежа
ПРОСЕКОТ НА НАЈВИСОКИТЕ ПЛАТИ ПОРАСНА ЗА 10,19 НАСТО
Кај платите, сликата е особено важна затоа што покажува кои компании најмногу вложуваат во трудот. Кај десетте компании со највисоки просечни плати во производството на вода и безалкохолни пијалаци, просекот во 2025 година изнесувал 40.852 денари, наспроти 37.074 денари во 2024 година.
Тоа значи дека кај оваа група компании просечната плата пораснала за 3.778 денари, односно за 10,19 насто.
На врвот е Соко Горица, со просечна плата од 52.063 денари во 2025 година. Кај оваа компанија платата пораснала за 16,44 насто, од 44.714 денари во 2024 година. Тоа ја става Соко Горица на првото место според просечната плата во оваа листа.
Втора компанија е Кожувчанка, со просечна плата од 47.595 денари и раст од 14,79 насто. Ова е значајно бидејќи Кожувчанка истовремено е и најголем работодавач меѓу компаниите во табелата, што покажува дека растот на обемот е проследен и со подобрување на просечните примања.
Пелистерка е трета, со просечна плата од 44.680 денари, но кај неа има пад од 2,20 насто во однос на 2024 година, кога просекот бил 45.685 денари.
На четвртото место е МЛ-Гари, со просечна плата од 39.893 денари и раст од 12,56 насто. Ова е особено интересно затоа што МЛ-Гари е и компанијата со најголем скок на приходот и со силен пресврт на добивката – од загуба во 2024 година до профит во 2025 година.
Грозд од Струмица има просечна плата од 39.001 денар, со мал раст од 0,93 насто. Мак-Минерал од Битола е на следното место со 38.663 денари и раст од 15,27 насто.
Најголем раст на просечната плата меѓу првите десет има Ликуки Хоме од Битола. Просечната плата во оваа компанија пораснала од 28.578 на 37.943 денари, што е скок од 32,77 насто.
Магрони има просечна плата од 36.874 денари, со раст од 13,10 насто, додека Горска има просек од 36.585 денари, но бележи пад од 4,56 насто во однос на претходната година.
Десетката ја заокружува Иноспектар од Велмеј, Дебарца, со просечна плата од 35.219 денари и раст од 10,97 насто.
Извор: Бизнис Мрежа
Како што беше напоменато и во анализата за приходот и добивката, Пивара Скопје е значаен производно-дистрибутивен систем и во сегментот на безалкохолните пијалаци, но нејзината основна дејност и најпрепознатлив производ се поврзани со пивото. Сепак, за споредба, Пивара Скопје во 2025 година имала 480 вработени, што е раст од 20 насто во однос на 2024 година, кога имала 400 вработени. Истовремено, просечната плата во компанијата изнесувала 72.814 денари, што е за 3,11 насто повеќе од 2024 година, кога просекот бил 70.615 денари.
Катерина Михајлова
Лектор: Христина Ангелеска-Мијоска
Преземањето на авторски содржини (текстови и фотографии) од оваа страница е дозволено само делумно и важат условите опишани на следниот линк.
