Аналитика
Надзорниот одбор на Стопанска банка а.д. Битола со одлука донесена на 25. седница, одржана на 10.11.2025 година, ја именуваше м-р Маја Кадиевска Војновиќ за нов член на Управниот одбор на Банката, која одлука ќе влезе во сила по добивање согласност од страна на Извршниот одбор на Народната банка на Република Северна Македонија за предложеното лице за член на Управен одбор на Банката.
Кадиевска Војновиќ веќе трета година или од јануари 2023 година е советник за стратешки работи на Управниот одбор на Стопанска банка а.д. Битола, а до јуни 2025 година беше и член на Надзорниот одбор на КИБС.
Вицегувернер на Народната банка беше во периодот од 2011 година до 2018 година, задолжена за Секторот на операции на финансиски пазари и платни системи. Како вицегувернер имаше две исклучително значајни позиции во рамките на Народната банка, претседател на Комитетот за инвестирање на девизните резерви и претседател на Комитетот за управување со актива и пасива, а воедно беше и член на Комитетот за оперативна монетарна политика. Активно беше вклучена во креирањето и спроведувањето на монетарната политика, во управувањето со девизните резерви на Македонија, во управувањето со билансот на централната банка, редовно присутна на годишните собранија на Монетарниот монетарен фонд (ММФ) и Светска банка и при мисиите на финансиски институции и кредит рејтинг агенции. Во своето шеснаесетгодишно искуство како централен банкар, на почетокот од својата кариера беше една од основоположниците на макроекономските проекции на Народната банка.
Тековно е и неизвршен член на Одборот на директори на Витаминка АД Прилеп. Претходно има работено како консултант за банки, а од февруари 2019 година до јануари 2023 година предаваше и на Универзитетот Американ колеџ Скопје по предметите вовед во микроекономија и вовед во макроекономија.
Кадиевска Војновиќ на јавноста ѝ е позната по бројните колумни за макроекономските состојби во државата и нејзините воочливи јавни настапи, а нејзиното име се вртеше за неколку значајни позиции во државата. Сепак, наспроти политиката, веројатно Кадиевска Војновиќ ги одбра банкарските води. Со ова назначување, Стопанска банка а.д. Битола добива силно засилување во нејзините органи на управување.
