Аналитика
Сѐ уште нема официјални информации за иднината на Мај Ворлд Македонија. Ќе изгорат или веќе изгореле големи пари? Се шпекулира со 50 милиони евра изнесени од земјава. Најкомпетентниот, кој ги има (или би требало да ги има) одговорите, со молкот уште повеќе ги разгорува претпоставките за бројот на „илјадниците измамени“ и за „украдените“ суми.
Одвреме навреме, во годините наназад, одделни информации за MyWorld во странските медиуми ќе кренеа тензија и кај нас, по што се губеше интерес за темата. Последната вест беше објавена минатата недела: „Со банкрот се соочува фирмата MyWorld International AG која е истовремено сопственик и на фирмата MyWorld Macedonia, чиј сопственик е Радован Витошевиќ кој до пред извесно време бил и оперативен директор на MyWorld International AG“.
Како и некои други медиуми, и Пари се обиде да исконтактира со Витошевиќ. Телефонската линија постојано е зафатена, а на пораката не одговори. Затоа се обидовме сликата за дејствувањето на Мај Ворлд Македонија да ја составиме преку бројките од работењето низ годините, користејќи ги податоците од Бизнис Мрежа.
Ова Друштво за трговија и услуги, со основна дејност за посредување во неспецијализирана трговија на мало, е основано во 2011 година, за што се вложени 20 илјади евра. Сопственик е MyWorld International AG, а управител – административен менаџер со неограничени овластувања во внатрешниот и надворешниот промет, Витошевиќ. По образование доктор по економски науки, со специјализација во сферата на менаџмент, финансии, маркетинг и мрежен маркетинг.
Во период од пет години, фирмата има парични приливи од вкупно 630.492.158 денари, што е еднакво на 10,25 милиони евра. Забележливо е дека по падот во 2021, приходите растат три години по ред, лани достигнувајќи 3,07 милиони евра, проследени со годишно зголемување за 7,7 насто.
Сепак, реалност е и фактот дека паралелно со приходите растат и трошоците. Последната промена – од 2023 до 2024 година е измерена со плус 16,3 проценти. Поточно, лани се работело за сума од близу три милони евра.
Радован Витошевиќ поставен за директор на Југоисточна Европа на компанијата myWorld
Оттаму, нето-профитабилноста минатата година е сведена на 45,6 илјади евра, при пад споредено со претходната 2023 година, од високи 76,9 отсто. Всушност, прекланската добивка од 197,4 илјади евра била и највисока во целиот тој период. Особено кога се има предвид дека 2020 и 2021 година се завршени со загуби од над 552, односно над 422 илјади евра. Меѓутоа, загубарски биле и 2018 со минус од 378,8 илјади и 2019 со минусот од 304,5 илјади евра.
Нето-профитната маржа, која е показател на (не)ефикасното претворање на приходите во добивка, во случајот на Мај Ворлд Македонија упатува на тоа дека – од секој заработен денар повеќе се губи отколку што останува. Движењата во овој сегмент се нестабилни: во 2020 година нето профитна маржа е -50,08 проценти, а уште полошо било во 2021 и тогашните рекордни -97,66 проценти. Трендот се променил во 2022 (+2,86%), а продолжил и во 2023 (+7,29%). Сепак, лани се случил прекин, односно маржата повторно паѓа и бележи само +1,53 проценти. Тоа претставува годишна негатива од 78,99 проценти.
Сето ова, пак, говори дека овој бизнис модел нема сила долгорочно да продуцира профит.
Извор: Бизнис Мрежа
Во изминатиот петгодишен период, со исклучок на 2021 кога биле седум, во фирмата работеле осум лица. Без оглед на проблемите, во последните три години се зголемувала нивната ефикасност. Секој од работно ангажираните приходувал по 308,4 илјади евра во 2022, по 356,1 илјада во 2023 и по 383,5 илјади евра лани. Трудот во 2024 им е наградуван со просечна плата од 90.848 денари, за 0,5 проценти пониска од прекланските 91.308 денари. Како и да е, просекот се задржал нешто под прагот на 1.500 евра.
Извор: Бизнис Мрежа
Мај Ворлд Македонија формално е жива фирма. Најверојатно, судбината на овдешните операции и на ќарот, односно зијанот на клиентите (ќе) зависи од австриските стечајни процеси и можеби од некое евентуално преструктурирање.
Сепак, не е првпат и не се случило само кај нас луѓето да наседнат на шемите за брза и лесна заработка. MyWorld International AG и Lyconet Austria GmbH се во стечај во Австрија, иако таму, исто како и во Швајцарија, нема забрана за овој начин на здружување. Тоа, пак, е случај во Италија и во Норвешка. За пирамидалната шема истраги се воделе во Шведска и во други европски држави, Грција, Франција, Полска, Унгарија…
M.A.
