Аналитика
Читајте квалитетна содржина на порталот ПАРИ – таму каде што информацијата вреди.
Новите податоци за јуни, што ги објави Фондот за пензиско и инвалидско осигурување, покажуваат дека нема пензија пониска од 18.192 денари. Според пресметките на Пари, тоа е 74,6 насто од сегашната минимална плата. Просечната пензија, пак, изнесува 26.207 денари. Државниот завод за статистика сѐ уште ја нема објавено просечната плата за јуни, но ако ги споредиме просечната пензија и просечната плата во мај, математиката кажува дека просечната пензија достигна 57 насто во однос на просечната плата.
Извор: Фонд за пензиско осигурување и Државен завод за статистика
Измените на Законот за пензиско и инвалидско осигурување што се изгласаа во четвртокот овозможија да има уште две линеарни зголемувања на пензиите, едно во септември и едно во март наредната година. Во законските измени не е наведено колку ќе биде тоа зголемување, туку се утврди методологија по која ќе се пресмета, а таа зависи од инфлацијата и од растот на просечната плата, но Владата излезе со претпоставен износ од 1.000 денари и тоа и за септември и за март. Образложението и овој пат, како и претходните два, кои донесоа вкупно линеарно зголемување на пензиите за 5.000 денари, е да се спаси стандардот на луѓето што земаат најниски пензии.
ТИЕ ШТО СЕ ПЕНЗИОНИРАЛЕ ПРЕД 1997 ГОДИНА ЗЕМААТ НАЈВИСОКИ МИНИМАЛНИ ПЕНЗИИ
Во државава нема закон за минимална пензија, но во согласност со методологиите што постоеле низ годините наназад, во зависнот од тоа кој кога се пензионирал, така се пресметувале и износите на пензиите.
Според јунските податоци, минимални пензии примаат 91.659 корисници на пензии, или 26,5 насто од сите пензионери (346.395). Станува збор за пензии до 21.909 денари, коишто ги земаат повеќе од една четвртина од пензионерите.
Притоа, најголеми минимални пензии имаат тие што се пензионирале до 31.12.1996 година. Со минимална пензија од 21.909 денари има 768 корисници.
Најниската пензија, од 18.192 денари, е за таканаречената трета група на пензионери, со остварено право до 1 јануари 1997 година, и ги има 2.196 корисници.
Пензија од 18.852 денари е минималната пензија што ја примаат најмногу корисници, вкупно 53.600, или 15,5 насто од сите пензионери. Станува збор за третата група на пензионери во категоризирањето на оние што го оствариле правото до 1 јануари 2002 година.
Извор: Фонд за ПИОСМ
ИМА 18 ПЕНЗИОНЕРИ СО ПО 88.013 ДЕНАРИ
Со пензии од 88.013 денари, што се највисоки пензии во јуни, има само 18 пензионери. Повисоки пензии, од 62.482 денари, како што информира Фодот за ПИОСМ, имаат нецел 1 насто од пензионерите, додека пак една поголема група на пензионери, 5,7 насто, зема од 43.740 денари до 62.481 денар.
Собранието во четвртокот со 79 гласа „за“ и ниту еден против и воздржан ги усвои измените на Законот за пензиско и инвалидско осигурување, со што се овозможи линеарен раст на пензиите.
Како што се посочува во Законот, сите видови пензии што се исплаќаат во земјава, на 1 септември 2025 година и на 1 март 2026 година ќе се усогласат на тој начин што вкупниот месечен износ добиен од процентот за зголемување на пензиите, пресметан како збир од 50 насто на порастот на индексот на трошоците за живот и 50 насто на порастот на просечно исплатената плата на сите вработени во претходното полугодие во однос на полугодието што му претходи, објавени од Државниот завод за статистика, се дели со вкупниот број корисници на пензија што го оствариле правото на пензија заклучно со 31 август 2025 година, односно 28 февруари 2026 година.
K.M.
Лектор: Христина Ангелеска-Мијоска
