Јајцата со замрзната цена, извозот ќе се ограничи за да нема недостиг на домашниот пазар, најави Бектеши

Цените на јајцата и оризот одат под мраз, соопшто министерот за економија Крешник Бектеши, кој најави дека таа одлука ќе биде донесена на утрешната владина седница, а ќе стапи во сила веднаш по објавата во Службениот весник. Цените на овие прехранбени производи ќе се замрзне на некое од дневните мартовски нивоа.

За деталите не сакаше да зборува, како што рече, за да не им се остави простор за шпекулации на дел од трговците. Односно, цените ќе се обелоденат кога ќе биде донесена одлуката. Меѓутоа, објави дека освен утврдувањето на цената, ќе биде означен и процент за извоз на јајца, со цел да се обезбеди домашниот пазар. Забрана за извоз не е можна, поради договорите со ЦЕФТА и ЕУ, рече Бектеши.

Инаку, производителите на јајца и претходно реагираа – доколку се случи замрзнување на цените, јајцата ќе станат дефицитарен производ, затоа што ќе бидат извезени на пазарите каде што има недостиг и нудат подобри цени. Оттука и ќе уследи владината мерка за ограничување на количините наменети за извоз.

„Во делот на јајцата, моментално се зголемува извозот кон другите држави, со поголеми цени од постоечките кои ги имаме на домашниот пазар. За да ги задржиме постоечките цени, а извозот да биде согласно тоа што било и претходно, ние утре нема да донесеме само одлука за замрзнување на цената, туку и ќе ограничиме доволно производство за потребите на домашниот пазар. Што значи дека процентуално ќе ограничиме колку од производството може да излезе надвор од земјава“, нагласи Бектеши.

И покрај тоа што се очекува зголемена побарувачка пред Велигденските празници, министерот тврди дека не само што нема да се дозволен раст на цената на јајцата, туку ќе нема ни недостиг.

Што се однесува до шеќерот и брашното, Бектеши рече дека „веќе има намалување, согласно податоците на Царинската управа во делот на увозните цени и цените за производство“, па затоа таму нема да се преземат мерки. „Очекуваме цените во наредните денови сами да паѓаат. Во случај тоа да не се направи од страна на трговците, кон крајот на оваа недела или почетокот на идната ќе следат дополнителни одлуки и за цената на шеќерот и брашното“, нагласи министерот.