Аналитика
Според извештајот на компанијата за анализа на блокчејн Елиптик, донациите на криптовалути за украинските граѓански активисти и волонтери скокнале на повеќе од 570.000 долари во 2021 година, што е 900% зголемување во споредба со претходната година.
Овие организации се појавија за време на таканаречената револуција на Мајдан во 2014 година, кога беше соборен прорускиот претседател Виктор Јанукович. После тоа, Русија го нападна и анектираше полуостровот Крим и поттикна граѓанска војна во источниот дел на Украина. Тогаш волонтерските групи почнаа да им помагаат на украинските вооружени сили и да ги гаѓаат проруските милитанти.
Групите се потпираат и на парични и на крипто донации, сепак, особено донациите на биткоин значително се зголемија во текот на изминатата година, открива Елиптик, бидејќи користењето на крипто им овозможува на меѓународните донатори да ги заобиколат финансиските институции кои ги блокираа плаќањата на овие групи. На пример, биткоин-паричникот на Come Back Alive, невладина организација (НВО) која собира средства за помош на украинската армија, собра над 3,8 БТК од август 2021 година, со неколку донации од 1 или 2 БТК.
Хактивистичката група Украинска сајбер алијанса, која ги таргетира проруските милитанти во источниот регион на Донбас, успеа да собере околу 100.000 долари во текот на изминатата година во биткоин, етер, лајткоин и неколку стабилни монети, рече Елиптик.
Друг проект, наречен Миротворец, веб-страница што ги објавува имињата и личните податоци на Русите кои тимот на проектот ги смета за „непријатели на Украина“, доби над 6,9 БТК од 2020 година на својата адреса за донации на биткоин. Проектот го следат контроверзи откако во 2016 година, меѓу другите податоци, објави список на сите новинари акредитирани од сепаратистичката влада на отцепениот регион Донбас, заедно со нивните контакт-информации.
Друга хактивистичка група, „Сајбер партизани“ со седиште во Белорусија, одговори на зголемените тензии меѓу Украина и Русија со напад на белоруската железница во јануари за да спречи нејзино користење за транспорт на руски војници до украинската граница. Групата собра 84.000 долари од донации на биткоин во изминатите шест месеци, рече Елиптик. Оваа група белоруски политички мотивирани хакери пред десетина дена објави на Твитер и Телеграма дека ги нарушиле компјутерските системи на Белоруските железници, националниот железнички систем во земјата, како дел од хактивистичкиот напор што напаѓачите го нарекуваат Врховна топлина. Тогаш хакерите објавија слики од екранот кои го покажуваат нивниот пристап до системите на железницата и тврдат дека ја шифрирале нејзината мрежа со малициозен софтвер, за кој би обезбедиле клучеви за дешифрирање само доколку владата на Белорусија исполни список со барања.
Тие повикаа на ослободување на 50 политички затвореници приведени во екот на протестите во земјата против диктаторот Александар Лукашенко, а од Белоруските железници побараа да не транспортираат руски војници на украинскиот фронт, откако Западот го обвини Кремљ дека се подготвува за можна инвазија на Украина.
