ЗГОЛЕМЕНИТЕ ЦЕНИ НА СУРОВИНИТЕ СЕ ОДРАЗИ НЕГАТИВНО ВРЗ РАБОТЕЊЕТО: Како сработи Жито Лукс и дали најавува корекција на цените?

Наспроти позитивните резултати во првото полугодие од 2021 година, споредбено со истиот период минатата година, притисокот во третото тромесечие од значително зголемените цени на суровините, пакувачките материјали и енергенсите се одрази негативно врз работењето на компанијата. Цената на пченицата, која директно влијае на цената на лебот и брашното, за една година се зголеми за најмалку 30%. Во последните месеци цената на енергенсите, независно дали се однесува на струја, гас или нафта, има тренд на пораст што дополнително предизвика зголемување на инпутите во производство. Земајќи го во предвид сето ова, беше неизбежно компанијата да реагира со корекција на цените на производите во четвртото тромесечие од годината.

Вкупни приходи

Приходите од продажба се намалени за 7%, генерално како ефект од COVID кризата која започна минатата година, што доведе до вонредно зголемена побарувачка на производи од сегментите брашно и леб со подолг рок, поради полицискиот час. Со оглед на постепено нормализирање на состојбите, а со тоа и на побарувачката во овој сегмент на производи, приходите од продажба на домашен пазар бележат намалување за 7%, додека приходите од продажба на странски пазар се зголемени за 6% во споредба со трите квартали од минатата година.

Вкупни расходи

Трошоците на произведени производи се намалени за 6% или 31,520 илјади денари споредено со истиот период минатата година. Намалените трошоци го следат трендот на намалување на продажбите, и покрај зголемените цени на влезните инпути. Фокусот на Компанијата останува кон рационализација на трошоците и зголемување на продуктивноста. Трошоците за продажба и дистрибуција се намалени за 1%, додека административните трошоци бележат намалување од 9%.

Останати оперативни приходи и расходи

Останатите оперативни приходи се зголемени за 9% поради еднократен ефект, додека вредносното усогласување и останатите оперативни трошоци се намалени за 2.5 милиони денари споредено со минатата година.

Кредитни задолжувања и финансиски расходи

Финансиските расходи се намалени за 16% или 2,095 илјади денари споредбено со истиот период минатата година, додека финансиските приходи се зголемени за 621 илјади денари.

Идни аспекти

Процесот на модернизација на производството продолжува со инвестиции до крајот на годината, водејќи кон поквалитетни и поекономични производствени процеси. Стратегијата на Компанијата е насочена кон проширување на постоечките пазари и влез на нови, воведување на нови производи со додадена вредност кои ќе ги задоволат потребите на купувачите, пропратени со силна медиумска подршка на истите.