Аналитика
Компаниите што редовно исплаќале плати преку АЛТА банка АД Битола повторно ќе можат да ги извршуваат овие исплати, заедно со соодветните даноци и придонеси. Ова го овозможува најновата измена на Решението за администрација, со која Народната банка продолжува постепено да ги олеснува ограничувањата за клиентите на банката.
Можноста важи за фирмите што во сите три месеци пред донесувањето на одлуката континуирано ги исплаќале платите преку платежни сметки во АЛТА банка. Притоа, износот што може да се искористи од сметката за оваа намена може да биде најмногу пет проценти повисок од вкупниот износ на платите исплатени во октомври.
Со ова се овозможува компаниите да продолжат со редовното исполнување на обврските кон вработените и државата, додека Народната банка ја задржува контролата врз одливите на средства од банката.
Измената носи олеснување и за физичките лица. Граѓаните ќе можат без ограничување на износот да располагаат со новите приливи на своите сметки во АЛТА банка, под услов средствата да бидат префрлени од платежни сметки во други банки или кај други даватели на платежни услуги.
Од Народната банка посочуваат дека внимателно ја следат состојбата во АЛТА банка АД Битола и дека мерките ќе продолжат да се приспособуваат во согласност со условите за работење и потребите на клиентите.
Приоритет останува заштитата на интересите на клиентите, со постепено олеснување на ограничувањата и задржување на контролата врз одливите на средства од банката.
