Десет европски божиќни пазари што треба да ги посетите оваа зима

Веселите божиќни пазари – осветлени со трепкачки светилки и исполнети со мирисот на варено вино – го најавуваат почетокот на празничната сезона. Повеќето европски градови нудат некаква верзија на овие зимски саеми, но потребно е многу повеќе од неколку украсни светилки и прескапи ситници за еден пазар да биде навистина посебен.

Вистинската комбинација од штандови со автентична храна, рачно изработени подароци и можност да го сретнете Дедо Мраз може да ги расположи дури и најмрзоволните поединци.

Од „Престолнината на Божиќ“ во Франција, па сè до традиционалните пазари низ Германија, Австрија и Белгија – ова се местата што вреди да се посетат, без разлика дали барате одлични подароци, чаша зачинето варено вино или едноставно сакате да почувствувате празничен дух пред големиот ден.

Еве ги 10-те божиќни саеми, препорачани од британски Индипендент, за оваа предпразнична сезона:

1. Будимпешта, Унгарија

Во Будимпешта сакаат рано да ја започнат божиќната сезона, па така уште од средината на ноември, на плоштадот „Верешмарти“ (Vörösmarty) никнуваат штандови со храна и подароци. Во празничната атмосфера се вклучува и плоштадот пред Базиликата „Свети Стефан“, каде што има лизгалиште, како и уште повеќе штандови со вкусна унгарска храна и разни ситници.

Овдешните пазари се фокусираат на зачувување на автентичната народна уметност и традиции, нудејќи висококвалитетни ракотворби наместо комерцијализирани божиќни подароци. Само следете го мирисот на цимет што се шири од традиционалните колачи во форма на оџак (т.н. „chimney cakes“).

Датуми на одржување: Отворени од 13 ноември 2026 до 1 јануари 2027 година.

2. Загреб, Хрватска

Загреб влегува во шестнеделна празнична еуфорија, при што хрватската престолнина ја исполнуваат најмалку десетина божиќни пазари. Ги има насекаде – во парковите, по патеките на ридовите, во тунелите, на плоштадите и по пешачките улици.

Како што е и очекувано за Хрватска, ќе наидете на многу повеќе штандови со храна отколку со подароци, па затоа нека ве води сетилото за мирис. Потоа, придружете им се на лизгачите на лизгалиштето што се протега низ „Ледениот парк“ (Ledeni Park). Не пропуштајте ги ни живите јасли (приказ на раѓањето на Исус) поставени во Каптол, пред Загрепската катедрала.

Датуми на отворање: Загребскиот божиќен пазар е отворен од 28 ноември 2026 до 7 јануари 2027 година.

3. Лил, Франција

Во срцето на француска Фландрија се наоѓа сипатичниот француски град Лил. Рустични дрвени куќички го исполнуваат плоштадот „Риур“ (Place Rihour) во Лил, нудејќи играчки и подароци, како и примамливи порции „тартифлет“ (tartiflette) со многу сирење и слатки вафли прелиени со чоколадо.

Веднаш зад аголот, на величествениот плоштад „Гран Плас“ (Grand-Place), можете да се повозите на огромното панорамско тркало, а потоа да ја посетите куќичката на Дедо Мраз. Секој петок во 18:00 часот, божиќното село оживува со музички настапи – пијанисти кои свират возејќи трицикли и артисти на штули украсени со светлечки елементи.

Датуми на отворање: Отворено од 19 ноември до 30 декември 2026 година.

4. Берлин, Германија

Во Берлин и неговите предградија има повеќе од 80 божиќни пазари, што нуди неверојатно голем избор. Најголемиот се наоѓа во стариот дел на Шпандау (Spandau), историско предградие во западниот дел на Берлин.

Ако барате нешто поблиску до центарот, посетете ги штандовите на плоштадот „Жендарменмаркт“ (Gendarmenmarkt) за да доживеете класичен германски божиќен пазар. На плоштадот „Александерплац“ (Alexanderplatz) ќе се вратите во минатото, благодарение на средновековниот пазар, рингишпилот во антички стил и лизгалиштето за ролери.

Датуми на отворање: Повеќето пазари во Берлин ќе бидат отворени до 23 ноември, а многу од нив се затвораат на 30 декември. Пазарот на „Жендарменмаркт“ се затвора на новогодишната ноќ, додека пазарот кај Градското собрание (City Hall) работи до 3 јануари.

5. Виена, Австрија

Елегантна Виена добива блескав изглед со отворањето на десетина божиќни пазари низ градот. Ако сакате целосно традиционално божиќно доживување, прошетајте низ пазарот пред дворецот Шенбрун (Schönbrunn) или низ божиќното село што го зазема плоштадот „Марија Терезија“ (Maria-Theresien-Platz). Придружете им се на лизгачите на лизгалиштето во „Vienna Ice World“ (Виенски свет на мраз), откако ќе ги вкусите сите австриски кулинарски специјалитети и ќе купите традиционални подароци на Стариот виенски божиќен пазар на плоштадот Фрајунг (Freyung).

Датуми на отворање: Божиќниот пазар кај дворецот Шенбрун (Schönbrunn) е отворен од 6 ноември 2026 до 6 јануари 2027 година.

6. Бриж, Белгија

Сликовитиот град Бриж изобилува со божиќен шарм, со своите средновековни градби што наликуваат на куќички од медењаци, украсени со безброј ситни светилки. Прославите, познати под името „Winter Glow“ (Зимски сјај), се прошируваат и надвор од главниот плоштад (Markt) – каде што ќе најдете штандови со ракотворби и храна, додека дополнителни привремени барови и штандови има и веднаш зад аголот, на плоштадот Симон Стевин (Simon Stevinplein).

Датуми на отворање: Отворен од 20 ноември 2026 до 3 јануари 2027 година.

7. Копенхаген, Данска

Прекрасно екстравагантните градини „Тиволи“ (Tivoli Gardens) стануваат уште пошармантно кичести кога ќе се појави божиќниот пазар. Покрај разгледувањето на штандовите со храна и подароци, можете и да се лизгате на мраз. А ако се најдете во Копенхаген на 13 декември, можете да ја проследите поворката за Света Луција – пловечка парада на кајаци украсени со многу светла, која се одвива по каналите.

Датуми на одржување: „Тиволи“ е отворен од 13 ноември 2026 до 3 јануари 2027 година.

8. Базел, Швајцарија

Иако помал по обем, но полн со шарм, божиќниот пазар во Базел се протега од плоштадот Минстерплац (Münsterplatz) до Барфисерплац (Barfüsserplatz) и вклучува 155 штандови, преполни со растопен раклет и сочни колбаси. Ако сè уште не сте се најале доволно, посетете ги штандовите со храна долж десниот брег на реката Рајна, кај плоштадот Клараплац (Claraplatz).

Качете се на кулата „Свети Мартин“ во катедралата во Базел за да уживате во уникатен поглед на блескавите светла, а потоа посетете го штандот „Kulpa Weihnachtskugeln“ и купете рачно насликана топка за вашата елка.

Датуми на одржување: Отворен од 26 ноември до 23 декември.

9. Стразбур, Франција

Најстариот и најголемиот божиќен пазар во Франција го претвора овој исклучително убав град во нешто навистина извонредно. Откако ќе ѝ се восхитувате на празничната атмосфера пред величествената катедрала, разгледајте ги стотината штандови на плоштадот Брогли (Place Broglie), а потоа дегустирајте алзашки специјалитети на пазарот на плоштадот Марше-о-Поасон (Place du Marché-aux-Poissons).

Во Стразбур се одржува и „OFF Market“ – општествено одговорен начин за прослава на празниците, кој вклучува штандови со половна стока и производи со ознака за правична трговија (Fairtrade).

Датуми на одржување: Отворен од 27 ноември до 24 декември.

10. Бирмингем, Англија

Германија пристигнува во Британија преку Франкфуртскиот божиќен пазар, кој го зазема плоштадот Викторија (Victoria Square). Ова е најголемиот германски пазар надвор од Германија и Австрија, идеално место за уживање во братвурст (германски колбаси), топло зачинето вино, шницли и секаков друг вид зимска храна за „душа“.

Во близина, на плоштадот кај катедралата (Cathedral Square), до средината на декември работи пазар со разновидна понуда на храна и ракотворби, претставени од околу 50 различни трговци.

Датуми на одржување: Отворен од 5 ноември до 24 декември.