Аналитика
Од амфитеатар до тркачка патека – група македонски студенти покажува дека инженерството не мора да остане само на формули, цртежи и предавања. Новиот болид на MES Racing е производ на една година работа, тестирање, решавање технички проблеми и тимска посветеност, а зад него стојат млади инженери кои своето знаење сакаат да го мерат со колегите од светот.
Новиот болид на единствениот македонски Formula Student тим беше официјално претставен на Машинскиот факултет во Скопје, каде што членовите на MES Racing ги презентираа резултатите од изминатата сезона, начинот на кој се развивал проектот и инженерските решенија вградени во возилото. По презентацијата следуваше и демонстративно возење.
На настанот присуствуваше и министерката за енергетика, рударство и минерални суровини Сања Божиновска, која оцени дека токму ваквите проекти покажуваат каков потенцијал има меѓу младите инженери во земјава.
„Македонија има иднина. А нејзината иднина се младите. Денес видовме што се случува кога знаењето, идеите, храброста и истрајноста ќе добијат поддршка. Овој болид не е само технички производ – тој е резултат на знаење, тимска работа, посветеност и многу часови вложен труд на овие млади луѓе“, истакна Божиновска.
Зад проектот не стои само една инженерска дисциплина. Во развојот на болидот се вклучени студенти од повеќе области, кои знаењето од машинството, електротехниката и другите технички дисциплини го претвораат во конкретен производ. Практично, тие работат како мал развоен тим во автомобилската индустрија – од идеја и проектирање, до изработка, тестирање и настап на натпреварувања.
Токму во тоа, според Божиновска, е и пошироката вредност на ваквите студентски проекти. Инвестицијата во младите инженери, науката и техничкото знаење, како што нагласи, треба да се гледа и како инвестиција во идната конкурентност на македонската економија.
„Како институции мораме да бидеме поддршка за младите кои создаваат. Нашата задача е да им помогнеме нивното знаење и идеи да добијат можност да се развиваат и да станат дел од реалниот индустриски и економски развој. Не смееме да дозволиме талентот да остане само потенцијал – треба да создадеме услови тој да се претвори во резултат“, порача министерката.
MES Racing е првиот и единствен македонски Formula Student тим. Преку меѓународните натпревари, студентите не го претставуваат само својот факултет и тим, туку и македонското студентско инженерство пред универзитетски екипи од други земји.
По презентацијата, тимот ѝ врачи благодарница на Божиновска за досегашната поддршка.
„Јас, пак, им благодарам ним – затоа што покажуваат дека младите не се само иднината на Македонија. Тие се нејзиниот сегашен потенцијал. Продолжете да создавате, продолжете да поместувате граници. Македонија има потреба од вас“, рече Божиновска.
За студентите од MES Racing, пак, новиот болид е повеќе од проект што треба да донесе добар резултат на натпреварување. Тој е практичен доказ дека и од универзитетските лаборатории во Македонија може да излезе сложен инженерски производ – и дека патот кон големата инженерска сцена може да почне токму од Скопје.
