Американските милијардери се збогатија за време на пандемијата

Датум на објава: 22.05.2020

Додека милиони Американци доживуваат финансиски потешкотии во услови на кризата предизвикана од ширењето на ковид-19, милијардерите во најголемата светска економија бележат раст на нивната нето вредност во првите два месеци од пандемијата, пишува „Business Insider“.

Публикацијата го цитира извештајот на невладините организации „Americans for Tax Fairness“ (Американци за даночна праведност) и „Institute for Policy Studies“ (Институт за студии на политики), во кој се утврдува дека нето средствата на милијардерите во САД се зголемиле за 434 милијарди долари заклучно со 19 март (кога беше воведен карантин во повеќето држави) па досега.

Според „Forbes“, има 623 милијардери во САД, меѓу кои е и основачот на „Amazon“, Џеф Безос, основачот на „Microsoft“, Бил Гејтс, шефот на „Facebook“, Марк Цукерберг, инвестицискиот гуру Ворен Бафет, основачот на „Oracle“, Лери Елисон и други.

Првите петмина на листата го зголемија своето богатство за 75,5 милијарди долари, или за 19% во последните два месеци.

Вкупното богатство на американските милијардери се зголеми од 2,95 трилиони долари на крајот на март на 3,38 трилиони долари во моментов.

– Пандемијата ги открива опасните последици од растечката социјална нееднаквост во земјата. Богатството на милијардерите е еден од најпаметните симболи на оваа нееднаквост – рече Френк Клементе, извршен директор на „Americans for Tax Fairness“.

Тој со години вршеше притисок за поефикасно оданочување на најбогатите Американци, потсетува „Business Insider“.

Според Клементе, по пандемијата, најбогатите бизнисмени и корпорации ќе треба да придонесат за поголем удел во даночните приходи на Министерството за финансии.

– Ова ќе ни овозможи да создадеме општество што работи за секого, не само за милијардерите – рече тој.

Извештајот е спротивен на податоците за растот на невработеност во земјата. Само во последната недела, повеќе од 2,4 милиони луѓе се пријавиле за социјална помош.


Тагови: business insider, Бил Гејтс, ковид19, корпорации, милијардери, Џеф Безос,

Facebook профил: pari.com.mk

Инстаграм профил: pari.com.mk

@pari.com.mk

© Преземањето авторски содржини е забрането со закон. Преземањето на текстови и изјави во авторска сопственост на порталот pari.com.mk е дозволено делумно, со задолжителен хиперлинк до содржината која се пренесува. Секое преземање фотографија означена со лого, без претходна согласност со pari.com.mk, е строго забрането.


Сподели: