Аналитика
Економската главоболка во Европа се засили откако Европската Централна Банка објави дека инфлацијата достигна 9,8 отсто во јули, и ја сигнализираше можноста за уште едно големо зголемување на каматните стапки. Официјалните бројки потврдија дека годишниот раст на цените достигна рекордни 8,9 отсто во еврозоната, но беше уште повисока кога во пресметката се вклучија и земјите од ЕУ надвор од зоната на единствената валута.
Податоците објавени во средата покажаа дека инфлацијата во Обединетото Кралство е над 10 отсто за прв пат во четири децении. Инфлацијата е поттикната од војната во Украина, која ги зголеми цените на енергијата и сè уште расте во Британија и Европа.
Спротивно на тоа, САД, каде енергетските пазари се многу помалку поврзани со каприците на Кремљ, забележаа пад на инфлацијата од својот врв.
Изабел Шнабел, членка на одборот за одредување стапки на Европската Централна Банка, рече дека изгледите за инфлација во Европа не се подобриле по изненадувачкото зголемување на каматната стапка за половина процентен поен минатиот месец. Таа изјави за новинската агенција Ројтерс дека загриженоста што го мотивираше тоа покачување „не е ублажена“. „Не мислам дека оваа перспектива е фундаментално променета“, рече Шнабел. „Не би исклучил дека, на краток рок, инфлацијата дополнително ќе се зголемува. Овие инфлациски притисоци веројатно ќе бидат со нас уште некое време; тие нема брзо да исчезнат“.
Таа додаде дека ќе биде „потребно некое време“ пред инфлацијата да се врати на целта на ЕЦБ од 2 проценти. Коментарите имплицираа дека Шнабел ќе се расправа за уште едно покачување за половина бод во септември.
Приносите на германските десетгодишни државни обврзници – репер за трошоците за задолжување во еврозоната – станаа повисоки по забелешките. Сепак, секој апетит за зголемување на каматните стапки би се оладил доколку внимателно следените бројки на индексите на менаџерите за набавки – што треба да се појават следната недела – укажуваат на економско забавување.
Вчерашните официјални бројки на Еуростат покажаа дека инфлацијата во областа на единствената валута минатиот месец во голема мера е предизвикана од цените на енергијата, што претставува нешто повеќе од четири процентни поени, а храната, алкохолот и тутунот се одговорни за два процентни поени.
Низ ЕУ, тој се движеше од 6,8 отсто во Франција и 8,5 отсто во Германија, до 10,7 отсто во Шпанија, 14,2 отсто во Полска и повеќе од 20 отсто во Литванија, Латвија и Естонија.
Компликација за ЕЦБ додека се обидува да ја скроти инфлацијата е тоа што се наѕира рецесија, која може да се влоши со зголемувањето на каматите.
Шнабел признава дека стравувањата од забавување би можеле да се влошат доколку дополнително се намалат испораките на гас од Русија, кои веќе се задушуваат. Германија – која исто така страда поради ниските нивоа на водата на Рајна, главната индустриска артерија – се чини дека ќе биде најтешко погодена. Но, Шнабел додаде: „Дури и да влеземе во рецесија, малку е веројатно дека инфлаторните притисоци сами по себе ќе се намалат. Забавувањето на растот тогаш веројатно не е доволно за да се намали инфлацијата.
Германскиот канцелар Олаф Шолц призна дека зголемените трошоци за енергија се „голем товар за многу граѓани“ по тој повод најави привремено намалување на ДДВ за природниот гас, од 19 на 7 отсто, до март 2024 година.
Во Соединетите Американски Држави, податоците кои покажуваат пад на барањата за невработеност вчера помогнаа да се смират стравувањата дека економијата е во рецесија. Тоа би можело да ѝ даде поголема слобода на нејзината централна банка, Федералните Резерви, која веќе агресивно ги зголемува каматните стапки за да се обиде да ја скроти инфлацијата, да продолжи со натамошни зголемувања.
Се очекува ФЕД да ги зголеми стапките за половина или три четвртини од процентниот поен следниот месец.
