Аналитика
Додека дел од аеродромите во регионот се соочуваат со намалување на линиите и пад на бројот на патници, Македонија годинава се движи во спротивна насока. Новите авиолинии и проширувањето на мрежата на нискобуџетските авиокомпании донесоа силен раст, со кој земјава се искачи на врвот меѓу авио-пазарите во поранешна Југославија.
Во периодот од јануари до мај, Македонија забележала дополнителни 375.766 патници, повеќе од која било друга држава од регионот, покажуваат податоците што ги објави специјализираниот портал „Екс-Ју Авиејшн“.
Главниот двигател на растот е скопскиот аеродром, кој во првите пет месеци од годинава опслужил 360.589 патници повеќе во споредба со истиот период минатата година. Со тоа, Скопје е аеродромот со најголем апсолутен раст на бројот на патници во поранешна Југославија.
Само во мај низ скопскиот аеродром поминале 355.929 патници, што претставува зголемување од 28,6 проценти на годишно ниво.
Според анализата на „Екс-Ју Авиејшн“, ваквиот резултат во голем дел е последица на проширувањето на операциите на „Виз Ер“ во Македонија, преку воведување нови дестинации и зголемување на бројот на летови на постојните линии.
Вкупно 21 комерцијален аеродром во земјите од поранешна Југославија, кои имаат редовен патнички сообраќај, во периодот јануари-мај опслужиле 13.105.289 патници.
Тоа е за 1.074.294 патници повеќе во споредба со истиот период минатата година.
Белград и натаму останува најпрометниот аеродром во регионот според вкупниот број патници, но Скопје е лидер според растот. Белградскиот аеродром во првите пет месеци додал 255.376 патници, иако се соочил со намалување на услугите од дел од авиокомпаниите од Блискиот Исток, меѓу кои и „Флајдубаи“.
Ваквите податоци покажуваат дека регионалната авио-мапа не се менува само според големината на аеродромите, туку и според брзината со која тие успеваат да привлечат нови превозници, линии и патници. Во таа трка, Скопје годинава се издвојува како најдинамичната точка во регионот.
Наспроти растот во Македонија, аеродромот во Приштина, по неколку години силна експанзија, почнал да бележи намалување на бројот на патници. Само во април сообраќајот бил намален за четири проценти во споредба со истиот месец минатата година.
Дополнителен притисок во наредниот период може да предизвика намалувањето на бројот на летови и на мрежата на GP Aviation, која е најголемиот авиопревозник на приштинскиот аеродром.
Со проблеми се соочиле и помалите хрватски крајбрежни аеродроми, откако биле суспендирани дел од домашните летови што ги извршува „Трејд Ер“. Причината е доцнењето на тендерската постапка за нов четиригодишен договор за домашните линии во рамките на обврската за јавна услуга.
Силниот раст продолжил и во јуни. Скопскиот и охридскиот аеродром во првата половина од годинава опслужиле вкупно 1.955.648 патници, што е зголемување од 28 проценти во однос на периодот јануари-јуни 2025 година.
За шест месеци биле реализирани 13.167 летови, односно 7,6 проценти повеќе во споредба со истиот период лани.
Само во јуни низ двата македонски аеродроми поминале 374.714 патници, што претставува годишен раст од 15,6 проценти.
Вицепремиерот и министер за транспорт Александар Николоски неодамна изјави дека резултатите се последица на владините политики во авиосообраќајот и отворањето на 28 нови авиолинии. Според него, скопскиот и охридскиот аеродром се меѓу најбрзорастечките аеродроми во своите категории во регионот.
Надлежните очекуваат двата аеродроми годинава да опслужат повеќе од 3,5 милиони патници, а во блиска иднина да ја достигнат и границата од четири милиони.
Доколку сегашната динамика продолжи, 2026 година би можела да биде една од најуспешните за македонскиот авиосообраќај. Предизвикот повеќе нема да биде само отворањето нови линии, туку и нивното долгорочно задржување, подобрувањето на поврзаноста и претворањето на растот на бројот на патници во поширока економска корист за туризмот и домашниот бизнис.
