Аналитика
Белата куќа покрена дигитален канал за стриминг што емитува програма 24 часа дневно, наречен „Trump TV: The Essentials Station“, во екот на растечкиот спор меѓу администрацијата на претседателот Доналд Трамп и неколку големи американски медиумски куќи. Каналот започна со работа во понеделникот преку официјалниот канал на Белата куќа на YouTube, а е достапен и преку веб-страницата на Белата куќа.
Од Белата куќа велат дека платформата ќе прикажува „најдобри видеа, важни изјави и клучни моменти што вреди да се видат“ од администрацијата на Трамп, со непрекинат стриминг и ажурирање во реално време.
Наместо да функционира како конвенционална телевизиска мрежа, „Trump TV“ претставува дигитален канал под државна управа што емитува избрани снимки од Трамп и неговата администрација, вклучувајќи говори, соопштенија и други јавни настапи.
Говорот на претседателот Доналд Трамп остана без звук за време на прес-конференцијата во понеделникот, откако телевизиската група за известување („пул“) го прекина преносот, а видеото обезбедено од Белата куќа не содржеше употреблив звук од неговите изјави.
Ова беше непосредната последица од обидот на Трамп да го ограничи пристапот на оваа група новинари.
Новинарскиот пул на Белата куќа опслужува стотици новинари, па губењето на независното телевизиско известување може да го ограничи она што медиумите – а со тоа и јавноста – можат да го видат и слушнат.
Претседателот Трамп во петокот најави забрана за CNN, MSNBC и Politico, а во саботата им ги одзеде акредитациите поради она што тој го нарече „лажни вести“.
CNN, MSNBC и Politico во понеделникот поднесоа тужба барајќи враќање на пристапот, тврдејќи дека забраната го прекршува Првиот амандман.
Одлуката да се повлече заедничкото телевизиско известување претставува редок пример на обединет отпор од жестоко конкурентните телевизиски мрежи против обидот на администрацијата да диктира што и како ќе гледа јавноста.
Прес-групата на Белата куќа е група новинари што се менуваат, а кои се присутни покрај претседателот за време на неговите јавни настапи и ги споделуваат своите извештаи, аудио и видео снимки со останатите медиуми. Групата брои околу 20 новинари. Тие патуваат со Трамп во авионот „Ер форс 1“ (Air Force One) и се сместуваат во тесниот простор на Овалната соба, обезбедувајќи информации во реално време.
Телевизиското известување се потпира на пет мрежи – ABC, CBS, CNN, Fox News и NBC – кои наизменично обезбедуваат снимки во живо. Трамп постојано се движи, па оваа група го олеснува и поевтинува документирањето на неговите активности и локации.
АВТОРСКИТЕ ПРАВА ИГНОРИРАНИ
Доналд Трамп ги игнорираше поплаките за авторски права од Нил Јанг, Аријана Гранде, Бијонсе и многу други поради неовластено користење на нивната музика. Денес беше објавено промотивно видео за „Trump TV“ во кое се користени снимки од „Пријатели“, „Симпсонови“, „Family Guy“, „Сам дома“, „Модерно семејство“, „Breaking Bad“, „Темниот витез“, „The Office“, „Сунѓерот Боб“, „Parks and Recreation“, „That ’70s Show“ и други.
Меѓу студијата и телевизиските мрежи чија интелектуална сопственост е искористена во промотивното видео се „Warner Bros.“, „Fox“, „Nickelodeon“, „Sony Pictures Television“, „Disney“ и „NBCUniversal“. Ова не е невообичаен потег за претседателот, кој редовно објавува видеа креирани со вештачка интелигенција што користат сцени од хитови како „Top Gun“. Сепак, овој потег е донекаде уникатен по својот обем. А можеби токму тоа е и целта.
Администрацијата го претстави каналот како „Станица за најважните содржини“ (The Essentials Station). Уште еден слоган на администрацијата за оваа услуга гласеше: „Не секој голем момент стигнал до вашиот телевизор, но сега тоа е можно“. „Њујорк тајмс“ го опиша каналот како „во суштина, форма на државна телевизија“.
