Аналитика
Светската банка денес објави дека мобилизирала рекордни 112 милијарди долари приватен капитал во текот на фискалната година што заврши во јуни. Оваа бројка е значително повисока од 69-те милијарди долари постигнати претходната година и претставува повеќе од тројно зголемување во однос на износот од 2022 година, пренесе Ројтерс.
Заедно со сопствените средства во висина од 123 милијарди долари , Светската банка одобри вкупно 235 милијарди долари за развојни проекти во текот на таа фискална година.
Околу 40 отсто од средствата беа наменети за инфраструктурни проекти, додека 26 отсто беа издвоени за регулаторни реформи.
Претседателот на Светската банка, Аџај Банга, има за цел повеќе од двојно да го зголеми обемот на мобилизиран приватен капитал во следните две до три години, достигнувајќи износ од над 200 милијарди долари.
Целта е да се привлечат институционални инвеститори и да се отстранат пречките што го попречуваат инвестирањето во земјите во развој.
Меѓу другите мерки, Банката работеше на стандардизирање на договорите за кредитирање и скратување на времето потребно за одобрување проекти, паралелно со внатрешни организациски промени и засилена соработка со финансиските институции.
(Фото: UKinUSA from Washington, D.C., USA)
