ВЛАДАТА ГИ ЗАМРЗНА ЦЕНИТЕ НА ЛЕБОТ И БРАШНОТО- Но цената на гасот, струјата, пченицата енормно се зголемија за Жито Лукс АД Скопје да го втурнат во загуба од 32 милиони денари за три месеци

Според одлука на Владата, цените на сите видови леб и брашно Т-400 беа замрзнати на ниво не повисоко од важечките цени на 1ви Декември 2021. Одлуката беше во траење од 2 месеца во 2022 година (од 1ви јануари до 28ми февруари). Истовремено, дојде до енормно зголемување на цените на сите инпути како енергенси (гас повеќе од 300%, електрична енергија повеќе од 200%), пченица (околу 38%) како и на останатите суровини и пакувачки материјали.

Земајќи го сето ова во предвид, Компанијата го заврши првото тромесечие од 2022 година со загуба пред оданочување од 32,034 илјади денари.

Приходите од продажба се зголемени за 8%, при што приходите од продажба на домашен пазар бележат зголемување за 6%, додека приходите од продажба на странски пазар се зголемени за 37% во споредба со минатата година. Дел од порастот на продажбите се должи на корекцијата на цените која беше спроведена во март 2021, но тоа зголемување не беше доволно за да се покрие континуираниот растечки тренд на цените на инпутите.

Трошоците на произведени производи изнесуваат 238,721 илјада денари, што претставува зголемување за 32% во споредба со претходната година. Зголемување се должи пред се на претходно споменатото зголемување на производните импути.

Трошоците за продажба и дистрибуција се зголемени за 2%, додека административните трошоци се зголемени за 4% споредено со истиот период минатата година.

Останатите оперативни приходи во износ од 3,095 илјади денари се зголемени за 17% споредено со првиот квартал минатата година.

Финансиските расходи се зголемени за 7% споредбено со првото тромесечие минатата година.

Идни аспекти

И покрај очекувањата да дојде до стабилизирање на цените во претстојниот период, последните проекции не се многу ветувачки. Секојдневно се соочуваме со континуирано зголемување на трошоците за производство и сето ова има големо влијание врз нашето работење.

Како компанија водиме голема грижа за потребите на клиентите и ги градиме нашите приоритети според нивните барања. Како најголема компанија за производство на леб и брашно која ја снабдува целата територија на РС Македонија со овие продукти, чувствуваме одговорност и вложуваме големи напори да ги амортизираме покачувањата на производните инпути, но за жал, неизбежна е промената на цените на производите.

Со фокус на лесно премостување на овој предизвикувачки период внимателно ја следиме ситуацијата и сите промени во локалната, регионалната и светската економија за да ги имаме сите потребни информации корисни во процесот на одлучување и ќе преземаме соодветни чекори, додека остануваме доследни и посветени на континуирано снабдување на пазарот со квалитетни производи.