Аналитика
Додека се дискутира за причините за наглото заминување на Кристијано Роналдо од португалската репрезентација, првичните проценки се дека овој потег на фудбалската ѕвезда можеби нема да нанесе сериозен удар на финансиската стабилност на Фудбалската федерација на Португалија, но може сериозно да ја намали комерцијалната вредност на националниот тим. Најреалните проценки упатуваат на загуба од околу 25 до 50 милиони евра до 2030 година, главно преку послаби спонзорски договори, merchandising, ТВ-вредност и меѓународна привлечност.
Точна бројка засега не постои, велат експертите во Португалија. Директорот на IPAM, Даниел Са, за Renascença вели дека не е можно прецизно да се утврди колкав дел од годишните приходи на федерацијата бил директно генериран од присуството на Роналдо. Но, според него, сосема е извесно дека ќе има корекции кај рекламирањето, merchandising, ТВ-правата и комерцијалните договори.
ДЕСЕТИЦИ МИЛИОНИ ДОЛАРИ ЗАГУБА
Најдобра почетна точка за проценката е структурата на приходите на федерацијата. Во 2024 година ФПФ имала буџет од околу 120,4 милиони евра, од кои околу 53 милиони евра доаѓале од ТВ-права, спонзорства и други комерцијални активности. За 2026/27 федерацијата веќе планира рекорден буџет од 159,1 милиони евра, но и со значајна зависност од настапите на репрезентацијата, комерцијалните партнери и меѓународната видливост. Токму тука „ефектот Роналдо“ е најсилен.
Еден од најсликовитите показатели дојде по Светското првенство 2026. Анализа на Nossa Sports и Felton процени дека содржините поврзани со Роналдо создале 92,9 милиони евра дигитална audience value, додека официјалните канали на португалската репрезентација создале околу 76,5 милиони евра. Тоа не се директни приходи, но многу добро ја покажува неговата рекламна моќ и способноста сам да генерира поголемо дигитално внимание од целиот национален тим.
Уште поширока слика дава IPAM, кој во 2025 година ја процени личната марка на Кристиано Роналдо на 850 милиони евра. Таа сума, секако, не е загуба на федерацијата, но покажува колкава комерцијална вредност исчезнува од брендот „Португалија“ кога Роналдо повеќе не е неговото најпрепознатливо лице.
Најдиректниот ризик е кај идните договори. Голем дел од главните партнери на федерацијата – меѓу нив MEO, Sagres, BPI, Continente, Galp и CUF – имаат долгорочни договори, главно до 2030 година. Тоа значи дека нема веднаш да исчезнат десетици милиони евра. Но при обновување или склучување нови договори, федерацијата веќе нема да може да продава пакет во кој автоматски е вклучено и глобалното внимание што го носеше Роналдо.
Падот може да се почувствува и кај ТВ-правата и пријателските натпревари. Економистот Жоао Дуке оцени дека присуството на Роналдо директно ја зголемувало атрактивноста и вредноста на натпреварите, бидејќи неговите фанови патувале и стотици километри само за да го гледаат. Без него, дел од тој премиум се губи. RR
Затоа, ако се земат предвид најизложените приходи и се претпостави постепено намалување на комерцијалната вредност до 2030 година, базното сценарио од околу 25 до 30 милиони евра загуба изгледа реално, додека во понегативно сценарио – со послаби спонзорски обновувања, пад на merchandising и помала вредност на меѓународните натпревари – сметката може да се приближи до 45–50 милиони евра.
Дополнителен сигнал дојде веднаш по заминувањето: според Observador, само за 24 часа официјалниот Instagram профил на репрезентацијата изгубил околу еден милион следбеници. Тоа не е финансиска загуба сама по себе, но е рана мерка за пад на вниманието што понатаму влијае врз цената на спонзорствата и дигиталните кампањи.
Суштината е дека Португалија не губи само фудбалер, туку и еден од најсилните лични брендови во светскиот спорт.
Кристијано Роналдо е милијардер, а финансиските проценки ја ставаат неговата нето-вредност меѓу 1,2 и 1,4 милијарди долари. Неговиот трансфер во клубот „Ал-Наср“ од Саудиската професионална лига му донесе годишни пакети на надомест во вредност од стотици милиони долари, со што значително ја зголеми вкупната заработка во текот на кариерата, надминувајќи ја границата од 2 милијарди долари.
Тој одржува профитабилни долгорочни партнерства, вклучително и доживотен договор со „Најк“ (Nike), како и соработки со брендови како „Бајнанс“ (Binance) и „Хербалајф“ (Herbalife). Неговиот личен бренд CR7 опфаќа хотели, фитнес-центри, парфеми и облека ширум светот. Своето портфолио го прошири и со инвестиции во компании како „Вуп“ (Whoop) и „Перплексити АИ“ (Perplexity AI).
„НА КЛУПА ЗА ПРВПАТ ПО 18 ГОДИНИ“
Кристијано Роналдо моментално се наоѓа во Мадрид, Шпанија, откако ненадејно го напушти тренинг-кампот на португалската репрезентација во Копенхаген. Роналдо го напушти тимот на Португалија пред натпреварот од Лигата на нации на УЕФА против Данска. Заминувањето уследи по несогласувањето со селекторот Жорже Жесус, откако Роналдо беше оставен на клупата за резервни играчи за време на натпреварот против Норвешка.
Кристијано Роналдо не настапи на натпреварот на Португалија во Лигата на нации на УЕФА против Норвешка на 27 септември 2026 година, бидејќи селекторот Жорже Жесус донесе тактичка одлука да не го внесе во игра како замена.
Роналдо на социјалните мрежи изјави дека својата страна на приказната ќе ја открие „во соодветно време“, со што останува неизвесна неговата иднина во репрезентацијата.
Гонсало Рамос одигра добро во нападот – постигна гол, а уште еден му беше поништен – па селекторот процени дека не е вистинскиот момент за измена. Треба, меѓутоа, да се напомене дека Роналдо одигра речиси 70 минути против Велс само три дена претходно, што влијаеше на одлуката тој да го започне натпреварот од клупата за резерви.
Тоа што остана на клупата во текот на целиот натпревар значеше дека, по повеќе од 18 години, Роналдо не одигра ниту една минута на официјален натпревар за Португалија иако беше дел од составот за тој меч.
