Аналитика
„Адобе“ (Adobe Inc) ќе ја купи стартап компанијата „Фигма“ (Figma) за околу 20 милијарди долари во нејзината најголема аквизиција во историјата.
Договорот за готовина и акции ќе ѝ овозможи на „Адобе“ сопственост врз компанијата, чија онлајн платформа за соработка за дизајни и бреинсторминг ја користат компании кои се движат од Zoom Video Communications до AirBnB и Coinbase.
„Комбинацијата на ‘Адобе’ и ‘Фигма’ е трансформациска и ќе ја забрза нашата визија за соработка во креативноста“, рече извршниот директор на „Адобе“, Шантану Нарајен во изјавата.
„Адобе“ го заостри својот фокус во доменот на алатки за соработка преку аквизиции во последниве години. Ја купи платформата за управување со работа Workfront во 2020 година и платформата за видео соработка базирана на облак, Frame.io минатата година.
Сепак, акциите на „Адобе“ паднаа за 13 отсто во почетокот на тргувањето. Некои аналитичари укажаа на големината на договорот, што би можело да бара од „Адобе“ да преземе долгови. Фирмата имаше готовина и парични еквиваленти од 3,87 милијарди долари заклучно со 2 септември.
„Разочарани сме од цената платена за компанијата (Figma)“, рече Дејвид Вагнер, портфолио менаџер и капитален аналитичар во Aptus Capital Advisors кој поседува 1,5 отсто од акциите во „Адобе“.
„Обично не е добар знак кога една компанија треба да купи за да одбрани удел. Тоа не е одржливо решение.
Во извештајот на CNBC минатиот месец се вели дека илјадници вработени на „Мајкрософт“ користат„Фигма“ , со што се врши притисок врз блиските односи на софтверскиот гигант со „Адобе“. Дистрибуцијата на машините што работат со Виндоус му помогна на „Адобе“ да стане сеприсутна, а компаниите исто така ги синхронизираат своите производи на повеќе платформи.
Договорот се очекува да се затвори во 2023 година, а „Фигма“ со седиште во Сан Франциско ќе продолжи да биде предводена од ко-основачот и извршен директор Дилан Филд. И двете компании ќе треба да платат 1 милијарда долари такса за раскинување доколку се повлечат од договорот.
Во меѓувреме, прогнозата за приходите на „Адобе“ за четвртиот квартал од 4,52 милијарди долари беше под проценките на аналитичарите од 4,58 милијарди долари, според податоците на „Рефинитив“.
Профитот во третиот квартал, исто така, падна за речиси 6 отсто, како одраз на влијанието на посилниот долар и повисоките трошоци.
