Аналитика
Жената осомничена за обид за разнесување на украински тајкун во Монако е пронајдена мртва во близина на Киев.
Анастасија Березовска, 39, беше именувана како главен осомничен за нападот врз Вадим Јермолаев, украински магнат за недвижности, на крајот од минатиот месец.
По меѓународна потера, Телото на Анастасија Березовска, 39, е пронајдено околу 23 часот по локално време, објави новинскиот портал „Украинска правда“, повикувајќи се на органите за спроведување на законот. Не е дадена официјална потврда.
Двајца осомничени веќе се приведени, објави медиумот. Едниот е службеник на Главната дирекција за разузнавање (HUR), додека другиот е поранешен службеник за спроведување на законот, пишува британски Телеграф.
Березовска наводно ја напуштила Украина помеѓу 22 март минатата година и 1 јули оваа година.
Се верува дека таа се преправила во маж пред да остави ранец со бомба составена од шрапнели и сачми во лобито на луксузен имот на улицата „Реверен Пере Луј Фрола“ во Монако на 29 јуни. Кратко потоа експлозија одекна низ зградата, при што беа повредени седум лица, меѓу кои Вадим Јермолаев, неговата партнерка Ана Насобина и 13-годишно момче за кое се верува дека е нејзин син.
Јермолаев беше лекуван од изгореници и рани од шрапнели во болница во Ница, но се верува дека неговиот живот повеќе не е загрозен. Неговата партнерка, за која беше објавено дека ги изгубила двете нозе, останува во критична состојба. Лекарите рекоа дека нејзината состојба останува критична по големата загуба на крв, со загриженост дека би можела да изгуби некои сетилни функции, вклучувајќи го видот, слухот и говорот.
По нападот, осомничената, која беше идентификувана по тетоважа од змија на десната рака, избега во францускиот град Босолеј пред да се упати кон Италија со автомобил со германски регистарски таблички, за кој обвинителите велат дека бил изнајмен за операцијата.
Нападот беше првиот обид за атентат со бомба регистриран во кнежевството, крајбрежно засолниште за богатите кое има една од најниските стапки на криминал во светот. Обвинителите веруваат дека веројатно е вклучен повеќе од еден сторител.
Се шпекулира за тоа кој би можел да го оркестрира обидот против Јермолаев, инвеститор во недвижности кој беше еден од најбогатите луѓе во Украина.
Јермолаев, кој добил кипарско државјанство во 2019 година, беше ставен под украински санкции во 2023 година. Украинските медиуми објавија дека санкциите се поврзани со наводна деловна активност во Крим, окупиран од Русија.
(Фото: Интерпол)
