Аналитика
Tурскиот претседател Таип Ердоган му предложил на извршниот директор на „Тесла“ (TESLA.O) Илон Маск да изгради фабрика во Турција, јавува државната новинакс агенција „Анадолија“.
Се наведува и изјавата на Маск дека многумина турски добавувачи веќе соработуваат со „Тесла“, па Турција е меѓу најважните кандидати за изградба на следната фабрика.
Од „Тесла“ се уште не одговараат на барањата за коментар на оваа тема.
Ердоган и Маск разговарале на состанокот во Turkish House, облакодер во близина на Обединетите нации во Њујорк, објави турската државна новинска агенција „Анадолија“.
Ердоган е во САД за да присуствува на 78 сесија на Генералното собрание на ОН.
Исто така, за време на состанокот Ердоган нагласил дека Турција е отворена за соработка во доменот на вештачката интелигенција и Старлинк, сателитски интернет потфат на SpaceX на Маск, соопштија од центарот за комуникации.
Маск, пак, како што се наведува, посочил дека SpaceX сака да соработува со турските власти за да ја добие потребната лиценца за понуда на сателитските услуги Starlink во Турција.
Исто така, се вели дека Ердоган го поканил Маск да присуствува на турскиот фестивал за воздухопловство и технологија „Текнофест“, што ќе се одржи во Измир на крајот од месецов. Одговорот на Маск бил дека со задоволство ќе присуствува.
Денес во Калифорнија Маск ќе се сретне и со израелскиот премиер Бенјамин Нетанјаху. Во фокусот на разговорите ќе биде технологијата за вештачка интелгенција, објави Маск на платформата Х.
Минатиот месец „Тесла“ пројави интерес за изградба на фабрика во Индија, каде што ќе се произведуваат евтини електрични возила.
Во моментот „Тесла“ има шест фабрики, а седмата ја гради во Мексико, во северната држава Нуево Леон. Тое е дел од напорите на производителот на автомобили да го прошири своето глобално влијание.
Маск во мај изјави дека „Тесла“ најверојатно ќе избере локација за нова фабрика до крајот на годинава.
Акциите на „Тесла“ се зголемија за 123 проценти во текот на оваа година, а овој производител во саботата соопшти дека го произведе својот пет милионити автомобил.
Покрај управувањето со „Тесла“, Маск лани го купи и X, порано познат како Twitter, за 44 милијарди долари.
Иако се опишува себеси како апсолутен поборник за слобода на говорот, Маск исполни одредени барања на турската влада за цензура на содржините во земјата.
