Аналитика
Американската војска мора итно да ги адаптира своите сили за да дејствуваат и да преовладуваат во спорни средини што се протегаат од дното на океанот до гравитациониот простор помеѓу Земјата и Месечината, изјави во среда претседателот на Здружениот генералштаб, генерал Ден Кејн.
„Нашата задача, пријатели мои, е да се адаптираме токму сега, за Здружените сили да бидат подготвени да се борат, да издржат и да победат во глобални спорни средини, од морското дно до цислунарниот простор“, рече Кејн на Конференцијата за воздухопловство, вселена и сајбер во американската држава Мериленд.
Повторувајќи дека „денешното модерно бојно поле функционира од морското дно до цислунарниот простор“, Кејн рече дека идните конфликти ќе ги разбијат долгогодишните претпоставки за неспорна логистика, безбедни засолништа или безбедни патишта за снабдување. Тој предупреди дека формациите на фронтовата линија мора да претпостават дека ќе бидат „ловени од автономни системи, блокирани низ целиот спектар и следени во реално време“.
„Во идната борба, предност ќе има страната која прва може да види, која прва може да разбере, прва да одлучи и прва да дејствува“, рече тој, повикувајќи ги здружените сили да испорачаат масовна смртоносна моќ користејќи агилна, оптимизирана „мешавина од борбени способности од висок и низок степен“.
Неговите предупредувања следат по објавувањето во понеделник од секретарот на воздухопловните сили Трој Мајнк, кој потврди дека Вселенските сили работат на орбита со „оружје за контрола на вселената“ способно да ги брани здружените сили од непријателски дејствија на противникот. Соопштението го означи првото формално јавно признание за вооружени американски платформи во орбитата, во услови на интензивирање на орбиталната конкуренција со Кина и Русија и развојот на мрежата за ракетна одбрана „Златна купола“.
Кина го осуди распоредувањето на САД, велејќи дека Пекинг се спротивставува на претворањето на вселената во „воена зона“ и го повика Вашингтон да го запре своето зголемено воено присуство во орбитата.
Иако Договорот за вселената од 1967 година забранува поставување нуклеарно оружје или оружје за масовно уништување во орбитата, тој не го забранува експлицитно конвенционалното оружје во вселената.
Кејн ја идентификуваше дигиталната автономија како примарен катализатор што ја трансформира модерната борбена динамика, надминувајќи ги сите други воени технологии.
„Ниту еден фактор не ги забрзува промените толку брзо како вештачката интелигенција и унапредувањето на сајбер-капацитетите“, рече тој, додавајќи „Вештачката интелигенција е тука сега и веќе го менува начинот на кој војските гледаат, чувствуваат, одлучуваат и дејствуваат“. За да илустрира како алгоритамската интеграција ги редефинира воените операции, тој посочи на еден инцидент од јуни, во близина на брегот на Оман, каде што автономно пловило управувано од вештачка интелигенција спаси двајца американски војници откако нивниот јуришен хеликоптер „Апачи“ се урна. „Земени заедно, овие примери – од Ормускиот Теснец до фронтот во Украина – покажуваат колку брзо технологијата го менува карактерот на војувањето“, рече тој.
Американскиот секретар за воздухопловни сили, Трој Меинк, во понеделникот изјави дека Соединетите Држави поседуваат „оружје за контрола на вселената во орбитата, способно да ги заштити Здружените сили од непријателски дејствија“, што претставува досега најдиректно признание од страна на претставник на Пентагон за присуството на американско оружје во орбитата. Меинк не прецизираше за какво оружје станува збор.
Кинескиот весник „Глобал тајмс“, кој ужива државна поддршка, во извештајот од вторникот наведе дека ова обелоденување ги разоткрива стремежите на Вашингтон кон „вселенска хегемонија“ и носи ризик од поттикнување глобална трка во вооружување во вселената.
Кинескиот воен аналитичар Сонг Џонгпинг изјави за весникот дека ова признание означува премин од заштита на вселенските капацитети и потпирање на копнени системи за дејствување против вселенски средства, кон директно распоредување оружје во орбитата. „Доколку САД продолжат по овој пат, другите земји може да бидат принудени да реагираат“, рече Сонг.
Минатата недела, државната новинска агенција „Синхуа“, во анализа на американска воена вежба во орбитата, наведе дека настојувањето на Вашингтон да ја военизира оваа сфера носи ризик од создавање „безбедносна дилема“, принудувајќи ги другите земји да ги зајакнат своите капацитети за дејствување против вселенски средства, што САД потоа би ги третирале како нови закани.
(Фото: поставување на сателит во Земјината орбита, НАСА)
