Аналитика
Врските помеѓу Северна Македонија и Данска се изградени врз споделени вредности, заемни интереси и заеднички видокруг за збиднувањата во светот, a клучен аспект при зајакнување на овие врски е да ѝ се помогне на земјата да напредува на европскиот пат, нагласи амбасадорката Сузане Шајн во обраќањето по повод 30-годишниот јубилеј од воспоставувањето на Генералниот Конзулат на Кралството Данска во Скопје.
„Врските помеѓу Северна Македонија и Данска се изградени врз споделени вредности, заемни интереси и заеднички видокруг за збиднувањата во светот. Клучен аспект од нашата работа при зајакнување на овие врски е да ѝ се помогне на земјата да напредува на својот пат кон ЕУ. Таа работа, секако, ќе ја продолжиме со новата Влада. Во оваа насока, сакам да истакнам дека Данска ќе го преземе претседавањето со Европската унија во 2025 година, а проширувањето на ЕУ ќе биде важен елемент на нашето претседателство. Со сите ангажмани на Данска во Северна Македонија, Генералниот конзулат на Кралството Данска играше централна улога и тоа ќе продолжи да биде така“, потенцира данската амбасадорка.
Како повод за славење го истакна и воздигнувањето на Живко Мукаетов од Витез на Редот на данското знаме, орден што го доби во 2016 година, во Витез од 1ва класа на Редот на данското знаме. Притоа, амбасадорката Шајн, во името на данската Влада, му се заблагодари на Мукаетов за неговата умешна дипломатија, силна посветеност и беспрекорен професионализам како Генерален конзул.
„Оваа голема чест беше едно од последните одликувања на Нејзиното Височество Кралицата Маргарете II пред нејзиното абдицирање од тронот во полза на нејзиниот син, Неговото Височество Кралот Фредерик 10ти“, посочи при одликувањето амбасадорката Шајн.
Генералниот конзулат на Кралството Данска со седиште во Скопје започнa со работа во јули 1994 година, по декрет издаден од данската Кралица Маргарете II, која за Генерален почесен конзул го назначи Трајче Мукаетов. Во 2007 година функцијата Генерален почесен конзул ја презема Живко Мукаетов, претседател на УО на АД „Алкалоид“. Од јуни 2023 година Мукаетов, исто така, ја извршува и функцијата Конзул на Кралството Норвешка.
Апликации за визи, работни дозволи, дански пасоши, дански возачки дозволи, бегалската криза во 1999 година, влезот на Данска во Шенген зоната во 2002 година, асистенција при високи државни посети, помош при бројни предизвици со кои дански државјани се соочиле во земјава, но и промовирањето на економската соработка и данската култура во земјава, се дел од активностите кои ова конзуларно претставништво ги работи веќе 30 години.
Орденот на данското знаме првпат бил воведен во 1671 година од страна на Кралот Кристијан V, кога редот имал само еден степен наречен Бел витез. Во 1808 година, по иницијатива на Кралот Фредерик IV, Редот на данското знаме бил поделен во четири степени, од кои првиот е резервиран за членови на кралското семејство. Ова исклучително признание, кое е едно од најстарите во светот, оддава почит за посветена работа за интересите на Кралството Данска, за заслужна државна или воена служба, за посебен придонес во сферите на уметноста, на науката или на бизнисот. Регистарот на данските Кралски ордени на витештвото, кој се води од 1884 година содржи околу 40.000 автобиографии на одликувани лица.
