Од полугодишната добивка Титан Усје ќе дели аванс на дивиденда од 13,64 милиони евра

Акционерите на Титан Усје ќе добијат аванс на дивиденда за успешното работење на компанијата во текот на првата половина од годинава. Во тој период е остварена добивка од 839,2 милиони денари или 13,645 милиони евра. Речиси целиот износ, односно 13,64 милиони се наменети за исплата на дивиденда. Секоја акција носи по 1.488 денари.

Одлуката е донесена од страна на Одборот на директори, како што е наведено во информацијата објавена на Македонска берза, „без одржување седница“.

Последен ден на тргување со право за исплата е 7 октомври, а прв ден на тргување без тоа право е 8 октомври. Деветти октомври, пак, е датумот на евиденција според кој ќе се определи листата на акционери кои имаат право да добијат аванс на дивиденда за периодот јануари – јуни 2026 година.

Исплатата ќе се изврши најдоцна до 31 декември.