Аналитика
Зголемен интерес за акциите на Стопанска банка Битола. На берзата помина блок-трансакција и во пакетот од 1.687 акции се вложени повеќе од 90 илјади евра. Истиот ден истргувани се и 1.167 акции на официјалниот пазар со промет од 60,7 илјади евра. По различна цена.
Хартиите од вредност издадени од битолската банка во блокот се продадени по единечна цена од 3.296 денари. Во домашна валута, вредноста на трансакцијата е 5.560.350 денари. Од почеткот на месецов ова е втор блок. На трети септември познат купувач се стекнал со илјада акции за кои платил 3.200.000 денари или над 52 илјади евра. По 3.200 денари за акција.
По таа цена се одвивало и вчерашното тргување, кога е направен промет од 3.734.400 денари.
Има интерес за оваа акција додека тече процесот и рокот за реализација на понудата од најголемата домашна банка. Сепак, „првата, последна и единствена понуда за откуп“, како што велат од Комерцијална банка, во случајот со блок-трансакцијата не е лимитирачки фактор.
Инаку, до крајот на неделава, акционерите на Стопанска банка Битола треба да го стават својот потпис на писмената изјава, со која се согласуваат своите акции да и ги продадат на Комерцијална банка. За целосно преземање на акциите, оваа банка издвоила вкупен износ од 20,3 милиони евра, пари уплатени на сметка во Централниот регистар за хартии од вредност.
