Аналитика
Тимот на Генерали Инвестментс подготви резиме за актуелните настани кои влијаат врз пазарите на капитал.
Закрепнување на глобалните берзански индекси
Очекувањата за идната монетарна политика остануваат клучен двигател на движењата на глобалните финансиски пазари. Со малку поблаги тонови од претставниците на ФЕД, ЕЦБ и други важни централни банки и економските податоци кои укажуваат дека каматните стапки во моментов се на доволно високи нивоа за да го продолжат трендот на намалување на инфлацијата, растот на бараните приноси на обврзниците е запрен, а берзанските индекси се зголемија значително.
ФЕД паузираше втор пат по ред
Како што се очекуваше, американската централна банка повторно паузираше минатата недела и ја задржа основната каматна стапка на ниво меѓу 5,25% и 5,5%. Гувернерот на ФЕД Пауел во својот говор даде до знење дека постои можност за ново зголемување во наредните месеци, но во исто време посочи дека сегашното ниво на каматните стапки има доволно влијание врз економијата, поради што ФЕД ќе биде претпазлив при следните состаноци. Инвеститорите беа задоволни од она што го слушнаа. Позитивното расположение се зголеми на крајот од минатата недела со податоците од американскиот пазар на труд, кој силно флуктуира од месец во месец, но со јасен тренд на успорување на растот. Стапката на невработеност во САД се зголеми од рекордно ниско ниво од 3,4% измерено во април оваа година, на 3,9% во октомври, што е највисоко од почетокот на 2022 година. Пазарите ги толкуваат податоците како доволно лоши за ФЕД да може да се оддалечи од својата политика на затегнување, но во исто време доволно добри што тие дополнително нема да го загрозат расположението на потрошувачите и економскиот раст.
Донекаде во сенка на централните банки и макроекономските податоци, сезоната за објавување на кварталните корпоративни резултати е во полн ек. И покрај фактот што некои мултинационални компании предводени од Apple и Alphabet не не импресионираа, генерално резултатите се подобри од прогнозите. S&P 500 минатата недела доби 5,9% во долари, што е негова најдобра недела во годината. Нешто повеќе (6,6%) доби технолошкиот индекс Nasdaq. Расел 2000 индексот на компании со помала пазарна капитализација ја заврши неделата со 8% во зелено, целосно поништувајќи го падот од досегашниот дел од годината.
Инфлацијата на еврото падна повеќе од предвиденото
Во последните две недели добивме повеќе позитивни податоци поврзани со инфлацијата на еврото. Растот на цените измерен со CPI во октомври во еврозоната беше само 2,9% на годишна основа, базичната инфлација падна на 4,2%. За падот на општата инфлација најмногу придонесоа пониските цени на енергетските производи кои паднаа за 11,1% на годишна основа, како и забавувањето на растот на цените на храната, алкохолот и тутунските производи. Приходот од повисоките каматни стапки и заладувањето на економијата полека почнува да се одразува и на европскиот пазар на труд, стапката на невработеност благо порасна од рекордно ниските нивоа на 6,5%. Отпуштањата се зголемија главно во преработувачката индустрија, каде што е најзабележливо ладењето. Како и да е, пазарот на трудот останува многу робустен дури и на стариот континент и ни оддалеку не ја одразува економијата на работ на рецесија.
Консензус на централните банкари
Поволните податоци за инфлацијата овојпат ја олеснија одлуката на европските централни банкари, кои за разлика од состаноците во претходните месеци, во октомври горе-долу едногласно ја поддржаа одлуката за задржување на основните каматни стапки. Истиот потег на американскaта и европската централна банка беше направен и на англиската, канадската, чешката, новозеландската и полската централна банка во изминатите две недели. Да резимираме, каматните стапки се на нивоата неопходни за нормализирање на инфлацијата, но централното прашање останува колку долго тие ќе опстојуваат на овие нивоа и колку ќе остане еластична економијата. Врз основа на зголемените очекувања дека врвот на каматните стапки е веќе достигнат, бараните приноси на најследените европски државни обврзници паднаа, додека берзанските индекси забележаа раст. Европскиот берзански индекс STOXX 600 минатата недела затвори со 3,41% во зелено.
Нема големи промени на пазарите во развој
Октомвриските податоци за индексот на менаџери за набавки во Кина повторно беа неубедливи, индексот PMI во производните активности се врати во зоната што укажува на намалување на активноста. Сепак, берзанските индекси на пазарите во развој забележаа благ раст под позитивното влијание на пооптимистичките политички прогнози на водечките светски централни банки. Кинеската влада се обидува да ги реши економските проблеми со дополнителна стимулативна мерка од 100 милијарди долари, но инвеститорите сметаат дека оваa мерка е недоволна. Економските проблеми нема да се решат со цедење пари, бидејќи причините се подлабоки и само делумно се резултат на помалата подготвеност на кинеските потрошувачи да трошат.
СОВЕТИ ЗА ИНВЕСТИТОРИТЕ
Зголемувањето на каматите заврши. Но каматните стапки ќе останат повисоки уште долго време, а економијата сеуште се прилагодува кон новата реалност. Инфлацијата се смирува, пазарот на трудот останува силен, економската активност забавува, но глобалната економија останува во зоната на раст, главно поради услугите. Глобалните и американските технолошки акции се скапи и ова е главната причина зошто остануваме внимателни со инвестициите во акции, иако најновите деловни податоци ги поддржаа сегашните нивоа на акции. Инвестициите во обврзници, главно поради врвот во циклусот на зголемување на каматните стапки и придвижувањето кон област каде приносите на обврзниците ќе бидат повисоки од инфлацијата, добиваат на привлечност. Неопходно е да се задржи долгорочен пристап со периодично зголемување на инвестициите. Глобалното диверзифицирано портфолио со комбинација од акциски фондови како што Генерали Топ Брендови, Генерали Америка и паричниот фонд Генерали Кеш Депозит, го нуди најдобриот одговор на зголемените вреднувања од една страна и забавувањето на глобалната економија од друга страна. Здравствениот сектор е поволно вреднуван, а во исто време се појавуваат некои добри приказни, како што е влез на вештачката интелигенција во здравството и лекот за дебелината. Иако технолошките акции се високо вреднувани, тие претставуваат остров на раст и со тоа остануваат привлечни за инвеститорите во оваа средина на успорување на глобалниот раст. Од статистичка гледна точка, кинеските акции остануваат атрактивни, но во последниве недели се акумулираат толку многу негативни вести што е малку веројатен брз пресврт на трендот, па затоа ја намалуваме препораката и во исто време оценуваме дека инвестициите во другите акциски фондови или обврзници во моментов нудат поатрактивен инвестициски профил.
