Аналитика
Досега Nvidia ги снабдуваше компаниите со „моторите“ на револуцијата на вештачката интелигенција. Сега сака да помогне да се најдат и парите за изградба на целиот систем околу нив. А сметката е огромна – повеќе од 500 милијарди долари.
Највредниот производител на AI-чипови се здружува со некои од најмоќните имиња на Волстрит за да создаде финансиски платформи преку кои ќе се обезбедува капитал за нови центри за податоци и таканаречени AI-фабрики. Во проектот влегуваат Apollo, BlackRock, Blackstone, Brookfield, Goldman Sachs и KKR.
Планот е преку овие платформи со текот на времето да се мобилизираат повеќе од 500 милијарди долари капитал од трети инвеститори. Nvidia, според извршниот директор Џенсен Хуанг, би можела да обезбеди дополнителна гаранција за најмногу 125 милијарди долари, односно до една четвртина од потенцијалните зделки.
Но, зад огромната бројка се крие уште поинтересна промена. Nvidia сака компјутерската инфраструктура што ја напојува вештачката интелигенција да престане да се гледа само како скапа технологија и да почне да се третира како долгорочен инвестициски имот.
Компанијата отворено го претставува својот „compute“ како нова инвестициска класа. Идејата е центри исполнети со Nvidia-процесори да можат да се финансираат слично како друга голема инфраструктура, а приходите да зависат од тоа колку се користи компјутерскиот капацитет. Goldman Sachs дури зборува за создавање пазар за кредит обезбеден со Nvidia compute.
Причината за ваквиот потег е едноставна – AI-трката станува прескапа дури и за најбогатите технолошки компании.
Amazon, Microsoft, Alphabet, Meta и другите големи играчи не покажуваат намера да го намалат инвестициското темпо. Според Reuters, нивните комбинирани вложувања поврзани со AI годинава треба да надминат 730 милијарди долари.
А тоа може да биде само почеток.
Financial Times, повикувајќи се на проценки на Morgan Stanley, објави дека само најголемите cloud-компании би можеле да вложат околу 3,5 илјади милијарди долари во AI-инфраструктура во периодот од 2026 до 2028 година. Вкупната изградба на инфраструктурата потребна за AI, според истите проценки, би можела да надмине осум илјади милијарди долари.
Оттука и новата улога на Волстрит. Наместо целиот товар за изградба на центри за податоци, набавка на процесори, енергетски капацитети и друга инфраструктура да паѓа врз технолошките компании, Nvidia сака во играта многу подлабоко да ги вовлече фондовите, приватниот капитал и институционалните инвеститори.
„AI-фабриките“ за кои зборува Џенсен Хуанг се, всушност, огромни центри за податоци во кои илјадници напредни процесори истовремено обучуваат и извршуваат модели на вештачка интелигенција. Колку AI станува пософистицирана и пошироко употребувана, толку е поголема потребата од ваква инфраструктура.
Nvidia веќе го подготвува теренот и преку други огромни инфраструктурни проекти. Во мај компанијата најави партнерство со IREN за поддршка на изградба на до пет гигавати AI-инфраструктура, а во јули со јужнокорејската SK Group објави поширока иницијатива вредна повеќе од 500 милијарди долари, која опфаќа AI-фабрики и следната генерација мемориски чипови.
Сето тоа покажува дека AI-бумот влегува во нова фаза. Во првите години главната приказна беа моделите како ChatGPT и чиповите што ги придвижуваат. Сега фокусот се префрла кон нешто многу поголемо – кој ќе ги обезбеди земјиштето, електричната енергија, центрите за податоци, процесорите и, пред сè, огромниот капитал потребен за следната генерација вештачка интелигенција.
Токму тука Nvidia гледа нова можност. Компанијата повеќе не сака да биде само добавувач на најбараните AI-чипови, туку и централната точка околу која ќе се финансира нивната употреба.
Сепак, 500-те милијарди долари засега не претставуваат готов фонд кој веднаш ќе биде потрошен. Nvidia и шесте финансиски партнери потпишале меморандуми за разбирање, а компанијата сè уште не ги објавила поединечните инвестициски обврски, конечните финансиски услови ниту рокот во кој капиталот треба да биде распореден.
Но, насоката е јасна: по битката за најмоќниот AI-чип, почнува уште поголема битка – кој ќе ја финансира инфраструктурата на која ќе работи вештачката интелигенција.
