Аналитика
„Инвеститорскиот ден“ или денот на кој граѓаните тргуваат со акции без дополнителни трошоци е успешен, оцени организаторот – Македонска берза. Ефектите од годинешниот настан, кој се одржа по четврти пат, се 207 трансакции и промет од речиси 600 илјади евра.
Достигнувањата се највисоки во однос на резултатите прикажани при тргувањата од почетокот на годинава па се до овој последен „Инвеститорскиот ден“.
Но, споредено со остварувањата од претходните три вакви настани забележливо е дека првоорганизираниот ден наменет за граѓаните се уште држи рекорди. Оттогаш наваму бројките се намалуваат. Тоа може да е последица од повеќе влијанија, меѓу кои чувството на несигурност, кризата, инфлацијата, но и неинформираноста и неедуцираноста за значењето на хартиите од вредност и можностите што ги нудат.
Кога станува збор за последните резултати, од Берзата информираа дека склучениот број трансакции, вкупно 207, е највисокиот во текот на еден ден, забележан годинава. За споредба, вториот најголем број трансакции на дневно ниво оваа година е 139. А, дневниот просек е 47.
Заинтересираните инвеститори поединци кои тргуваа со акции на сите пазарни сегменти, без да ги платат провизиите кон Берзата, кон Централниот депозитар на хартии од вредност и овластените пазарни учесници – банките и брокерските куќи, реализираа промет поголем од 595 илјади евра, односно околу 37 милиони денари. Тоа е за 2,3 пати повеќе во споредба со просечниот дневен промет во БЕСТ системот, регистриран годинава, посочуваат од Македонска берза.
Освен тоа, во текот на „Инвеститорскиот ден“ во БЕСТ системот членките на Берзата внесоа вкупно 336 налози за тргување, што исто така е најголем број забележан во текот на оваа година.
За потсетување, „Инвеститорскиот ден“ се востанови како практика на 18 септември 2020 година. Резултатите постигнати тогаш, досега се ненадминати – 339 трансакции и вкупен промет во БЕСТ системот од над еден милион евра.
Тринаесеттиот ден од септември како инвеститорски се утврдува во 2021 година. Во вториот обид да се привлечат домашните индивидуални инвеститори биле склучени 262 трансакции со вкупен промет од 640.000 евра.
Лани, пак, во евиденцијата на Берзата влегле 242 склучени трансакции и вкупен промет во БЕСТ системот од 516.000 евра.
Со исклучок на прометот кој годинава е повисок за 79.000 евра од ланскиот, падот на бројките се одвива во континуитет.
Кај склучените трансакции, по години, се движи 77, 20, 35. Или, 132 трансакции помалку од првиот до последниот „Инвеститорски ден“.
Што се однесува до прометот, движењето по удолна линија изгледа вака: минус 360.000 евра, минус 124.000 евра. Вкупно 484.000 евра разлика од првиот до третиот „Инвеститорски ден“. Но, без оглед што сега износот е во плус во однос на ланскиот промет, сепак е далеку од првичните еден милион евра.
Иницијативата има за цел да се стимулира учеството на домашните индивидуални инвеститори на македонскиот пазар на хартии од вредност. Граѓаните да вложуваат во акции издадени од домашните компании со кои се тргува на Македонска берза. И, да се подобри инвестициската култура во државата. Според показателите, потребно е повеќе да се работи на тоа поле.
М.А
