Аналитика
Цените на нафтата на глобалниот пазар продолжија да опаѓаат по извештаите за напредок во преговорите меѓу САД и Иран, како и поради подготовките на Саудиска Арабија за повторно пуштање во употреба на клучниот нафтовод „Исток-Запад“. Цената на американската нафта WTI падна под 90 долари за барел, откако претходно забележа пад од околу 10% во текот на изминатите пет дена, пренесува Блумберг.
Фјучерсите за WTI нафтата паднаа за уште 1%, достигнувајќи 89,66 долари за барел. Цената на нафтата од типот брент се намали за 1,1% и изнесуваше 99,25 долари за барел.
Американскиот претседател Доналд Трамп изјави дека средбата меѓу американските претставници и иранските пратеници била „многу продуктивна“ и наведе дека страните планираат да продолжат со контактите.
Саудиска Арабија ги обнови операциите на нафтоводот Исток-Запад, кој беше затворен на 11 септември по нападите со беспилотни летала. Кралството се подготвува да го продолжи извозот на нафта од пристаништето Јанбу на Црвеното Море, објави Ројтерс.
Дополнителен притисок врз цените вршат и очекувањата за обновување на извозот преку саудискиот нафтовод, кој овозможува транспорт на нафта заобиколувајќи го Ормускиот теснец. Неговиот капацитет достигнува 7 милиони барели дневно. Нафтоводот беше оштетен за време на нападите на почетокот на септември, но Саудиска Арабија планира во наредните денови да го обнови извозот преку оваа траса.
И покрај неодамнешниот пад, цената на нафтата е зголемена за повеќе од 60% од почетокот на годината, како последица на војната на Блискиот Исток и прекините во снабдувањето преку Ормускиот теснец.
(Фото: нафтовод Исток-Запад, Саудиска Арабија)
