Аналитика
Економскиот институт ИФО ја намали прогнозата за економски раст на Германија за следната година на 4,2 проценти од претходно предвиденото ниво од 5,1 процент.
Економското закрепнување засега забави поради рестриктивните мерки кои се на сила од ноември и кои најверојатно ќе останат непроменети до март 2021 година.
Во исто време, IFO ја зголеми проекцијата за раст за 2022 година на 2,5 проценти во споредба со 1,7 проценти, како што првично предвидуваше, се вели во соопштението на економскиот институт.
„Неодамнешните мерки за затворање во Германија и другите земји ја менуваат брзината на закрепнувањето. Производството на стоки и услужниот сектор нема да го достигнат нивото пред кризата до крајот на 2021 година “, вели Тимо Волмерхаузер, раководител на одделот за предвидувања на Институтот ИФО. Оваа година, додава тој, најверојатно ќе заврши со натамошен пад на бруто домашниот производ (БДП) како резултат на затворањето.
Аналитичарите на Институтот ИФО очекуваат германскиот БДП да падне 5,1 процент во 2020 година, нешто подобар од претходно предвидениот пад од 5,2 проценти. Според нив, сегашните мерки за контрола на бројот на инфицирани постепено ќе се олеснуваат од април и целосно ќе бидат укинати до летото.
Врз основа на овие претпоставки, ИФО проценува дека бројот на невработени ќе се зголеми од минатогодишните 2,3 милиони луѓе (пет проценти) на 2,7 милиони (5,9 проценти) во 2020 година и ќе остане на тоа ниво во текот на следните години. За 2022 година, институтот предвидува дека оваа бројка ќе падне на 2,5 милиони луѓе (5,5 проценти).
Институтот ИФО предвидува дека дефицитот на германскиот буџет годинава ќе се намали од 160,5 милијарди евра на 133 милијарди евра следната година и на 84,3 милијарди во 2022 година.
