Аналитика
Илон Маск најави дека ќе покрене судска постапка против Apple во име на својот стартап за вештачка интелигенција xAI, обвинувајќи го производителот на iPhone дека го фаворизира OpenAI и ги крши антимонополските прописи преку управувањето со рангирањата во App Store. Во објава на платформата X, Маск тврдеше дека Apple се однесува на начин што ѝ оневозможува на која било компанија за вештачка интелигенција, освен OpenAI, да го достигне првото место во App Store, додавајќи дека тоа е недвосмислено кршење на антимонополските прописи и дека xAI ќе преземе итни правни мерки. Претходно истиот ден, тој директно ѝ се обрати на компанијата, прашувајќи зошто одбива да ги стави X или Grok во делот „Задолжително“, иако X е апликација за вести број еден во светот, а Grok е петта меѓу сите апликации, сугерирајќи дека можеби зад тоа стојат политички мотиви.
Во моментов, ChatGPT на OpenAI е на врвот на листата „Најдобри бесплатни апликации“ во САД, додека Grok на xAI е на петтото место. Apple има партнерство со OpenAI кое овозможува интеграција на ChatGPT во iPhone, iPad и Mac, што дополнително ја зголемува чувствителноста на обвинувањата. Изјавите на Маск предизвикаа остра реакција од Сем Алтман, извршниот директор на OpenAI и негов поранешен деловен партнер. Алтман на X напиша дека тврдењата на Маск се извонредни со оглед на тоа што, според него, Маск самиот манипулирал со платформата X за да му користи на себе и на своите компании, и за да им наштети на своите конкуренти и на луѓето што не ги сака.
Алтман го обвини Маск дека ги менувал алгоритмите на X за да ги фаворизира сопствените објави, обвинување што Маск го демантираше. Двајцата имаат заедничка историја – ја основаа OpenAI во 2015 година, но Маск се повлече во 2018 година откако не успеа да ја преземе компанијата, а неговото понатамошно финансирање беше стопирано. Оттогаш, Маск двапати ја тужеше OpenAI, нарекувајќи ја транзицијата кон профитно претпријатие „измама од шекспировски размери“, додека Алтман го претставува како огорчен поранешен партнер кој е љубоморен на успехот на компанијата по неговото заминување.
Онлајн препирката продолжи со лични прозивки. Маск забележа дека твитот на Алтман имал повеќе прегледи и покрај тоа што тој има 50 пати повеќе следбеници, на што Алтман возврати дека тоа е „прашање на вештини“ или можеби резултат на „ботови“. Алтман јавно го праша Маск дали е подготвен под заклетва да потврди дека никогаш не наредил промени во алгоритмот на X со цел да му наштетат на конкуренцијата или да им помогнат на неговите компании, ветувајќи извинување доколку тоа е вистина.
Во меѓувреме, корисниците на X, преку функцијата community notes, потсетија дека и други апликации освен OpenAI стигнале до врвот на App Store и по почетокот на партнерството Apple–OpenAI. Во јануари 2024 година, кинеската апликација DeepSeek беше на првото место во App Store во САД, а во јули истата година Perplexity го зазеде врвот во индиската продавница. На прашањето на еден корисник упатено до Grok кој е во право во расправијата, четботот одговори дека врз основа на потврдени докази Сем Алтман е во право.
Целиот случај се одвива во момент кога Apple се соочува со засилен притисок од регулаторите. Во март 2024 година, Министерството за правда на САД поднесе антимонополска тужба, обвинувајќи го Apple за создавање и одржување на „широк, одржлив и нелегален“ монопол на пазарот на паметни телефони. Дополнително, оваа година Европската Унија му изрече казна од 500 милиони евра поради ограничувања што им оневозможуваат на програмерите да ги насочуваат корисниците надвор од App Store.
