Македонија го презеде претседавањето со ЦЕФ: Средба на Димитриеска-Кочоска и Вуковиќ во Подгорица

Министерката за финансии Гордана Димитриеска-Кочоска, во рамки на работната посета на Црна Гора, оствари средба со нејзиниот црногорски колега, министерот за финансии Новица Вуковиќ, во Подгорица.

На средбата беше официјализирано преземањето на претседавањето со Управниот одбор на Центарот за развој на финансии (ЦЕФ) од страна на Министерството за финансии на Република Северна Македонија, позиција што досега ја извршуваше Црна Гора.

Министрите разговараа за идните приоритети на ЦЕФ, со акцент на зајакнување на капацитетите за управување со јавните финансии и важноста од меѓусебна соработка помеѓу земјите-членки.

Особено внимание беше посветено на буџетското планирање во рамки на фискалните правила на Европската унија – одржување на буџетски дефицит под 3% од БДП и јавен долг под 60%.

Димитриеска-Кочоска ја нагласи заложбата на Македонија за почитување на овие критериуми, додека Вуковиќ ги сподели искуствата на Црна Гора во однос на фискалната дисциплина и буџетското управување.

Меѓу другото, биле разгледани и мерки за намалување на јавниот долг и справување со сивата економија, како и усогласување на регулативите на Управата за јавни приходи и Царинската управа за поголема транспарентност.

Соговорниците разменија мислења и за предизвиците поврзани со онлајн купувањата од странство, со фокус на царинските и даночните аспекти.

Средбата заврши со заедничка подготвеност за унапредување на билатералната и регионалната соработка, како и размена на искуства во рамки на евроинтегративниот процес.