Аналитика
Повеќе од 280.000 Канаѓани потпишале петиција со која бараат од премиерот Џастин Трудо да му го одземе канадското државјанство на технолошкиот магнат Илон Маск поради дејствување против националниот интерес на Канада. Најбогатиот човек на светот, имено, неодамна објавил на Икс дека „Канада не е вистинска земја“.
Покрената на 20 февруари, парламентарната петиција тврди дека Маск, шеф на Одделот за владина ефикасност на американскиот претседател Доналд Трамп, „станал член на странска влада која се обидува да го избрише канадскиот суверенитет“.
Исто така, го обвинува дека е „ангажиран во активности кои се против националниот интерес на Канада“ и дека го користи своето „богатство и моќ за да влијае на [канадските] избори“.
Маск, најбогатиот човек на светот, има јужноафрикански, американски и канадски пасош – од кои канадскиот ги стекнал преку неговата мајка, која е родена во Канада.
Маск стана глобално познат како извршен директор на Tesla и SpaceX, како и сопственик на X, но неодамна се вплетка во американската политика како еден од најблиските доверливи луѓе на Трамп.
Милијардерот беше покрај Трамп додека тој ги влоши односите меѓу Вашингтон и Отава заканувајќи се дека ќе додаде царина од 25 отсто на канадските и мексиканските стоки, што практично ќе ја поништи тридецениската слободна трговска зона меѓу САД, Канада и Мексико.
Трамп ги стави во мирување царините на 30 дена на почетокот на февруари за да овозможи преговори меѓу Вашингтон, Отава и Мексико Сити, но во понеделникот рече дека ќе продолжи со мерките следната недела.
Тој, исто така, се закани дека ќе воведе царина од 25 отсто за целиот увоз на челик и алуминиум во САД, вклучително и од Канада.
Трамп и Маск дадоа забелешки кои сугерираат дека Канада треба да стане „51-та држава“ на САД, при што Маск се осврнува на Трудо како „гувернер на Канада“. Маск даде слични забелешки како одговор на петицијата, тврдејќи на X дека „Канада не е вистинска земја“.
Канадската петиција, спонзорирана од пратеникот на Нова демократска партија, Чарли Ангус, е отворена до 20 јуни, кога ќе биде претставена до Парламентот за потенцијален одговор од владата.
Не е јасно како Отава би можела да одговори на петицијата.
Според канадскиот закон, државјанството може да се одземе во случаи на сериозни кривични дела како што се предавство и шпионажа или кога поединецот „извршил измама, погрешно се претставил [себе] или свесно сокрил информации за барање за имиграција или државјанство“.
