Аналитика
Јавниот сектор, односно сервисот кој ги опслужува граѓаните лани броел 129.374 вработени и во однос на претходната 2021 година таа бројка е намалена за 1.809 лица. Или, една петтина од вкупниот број вработени се дел од јавната администрација. Сепак, како што пишува Порталб.мк, има расчекор меѓу вкупниот број вработените во тој сектор и вкупниот број пополнети работни места, бидејќи во образованието и во здравството има лица кои се ангажирани во две или повеќе институции.
Според анализата, Министерството за внатрешни работи, со 11.694 лица, е еден од ресорите со најмногу вработени. Во образованието има 37.231, а во ресорното Министерство за образование работат 234 лица. Во областа на здравството лебот го вадат 19.428, додека Министерството за здравство функционира со 118 вработени.
Број на вработени по сектори е следен:
- Образование 37.231
- Здравство 19.428
- МВР 11.694
- Труд и социјала 7.041
- Правда 931
Министерството за култура вработува 132 административци, а целиот тој сектор опфаќа 3.409 лица. Во Министерството за труд и социјална политика лани работеле 243, а во јавните установи под овој ресор 7.041 лице. Во Министерството за правда работат 205, додека во секторот правда има 931 вработен. Министерството за земјоделство вработува 1.005 лица, Министерството за одбрана 687, Министерството за финансии 575, а во Министерството за политички систем се вработени 390 лица. Во МНР работат 258, останатите ресори се со помалку од 250 работно ангажирани.
Вработени во министерствата:
- Министерство за земјоделство 1.005
- Министерство за одбрана 687
- Министерство за финансии 575
- Министерство за политички систем 390
- МНР 258
Во инспекторатите, заедно со даночните и царинските службеници и инспектори (органи во состав на министерствата) вработени се 4.284 лица. Од нив, 1.223 се во Царинската управа, 1.008 во УЈП, во Управата за водење на матични книги 466, во Државниот пазарен инспекторат 262, а во Државниот инспекторат за труд 203 лица.
Во агенциите и дирекциите основани од државата со статус на самостојни органи се ангажирани 3.360 луѓе. Најголем број – 785 се во Агенцијата за катастар, во Агенцијата за храна има 362, во Центарот за управување со кризи 342, во Државниот архив 275, а во Дирекцијата за спасување 255 вработени. Во останатите институции од оваа група има помалку од 230 вработени.
Правосудни институции:
- Судови 2.182
- Јавни обвинителства 390
- Судски совет 33
- Совет на јавни обвинители 8
Во правосудните институции лани имало вкупно 2.613 вработени.
Новиот Извештај од регистарот на вработени во јавниот сектор за 2022 година покажува дека само во судовите во земјава се вработени 2.181 лица, а најголем број е забележан во скопскиот Основен граѓански суд – 249 и Основниот кривичен суд – 290. Следуваат Основниот суд Тетово со 124, Апелациониот суд со 120 и Основниот суд Куманово со 114 вработени. Останатите судови се со помалку од 100 вработени.
