Безбедносната агенција на Северна Македонија во вторникот соопшти дека спречила „терористички“ заговор за атентат насочен кон лице во соседна Грција и разоткрила мрежа поврзана со Иран.
Агенцијата за национална безбедност (АНБ) изјави дека разбила „широка мрежа на посредници“ поврзани со иранскиот државјанин Едрис Џахангири Маванех, кој бил „соработник на иранските безбедносни и разузнавачки служби“, објави весникот Катимерини.
Мрежата, „по директни инструкции од иранскиот државјанин, презела подготвителни логистички активности за извршување терористички чин/атентат врз лице во Грција“, наведоа од Агенцијата.
Операцијата била спроведена во соработка со грчката национална разузнавачка служба, додадоа оттаму.
АПСЕЊА ВО МАКЕДОНИЈА И ГРЦИЈА
Пет лица се уапсени во Северна Македонија и Грција во рамките на заедничка разузнавачка операција насочена против мрежа на поединци кои подготвувале терористички напад или атентат врз одредено лице во Грција, при што наводно дејствувале во име на ирански државјанин.
Еден маж од Северна Македонија е уапсен во Грција и екстрадиран во својата матична земја во врска со овој заговор, додека четворица негови сонародници се уапсени во Скопје, се наведува во соопштението на Агенцијата за национална безбедност (АНБ).
На четворица осомничени им е одреден притвор, додека еден е ставен во домашен притвор, изјави за локалните медиуми Александар Јанев, претставник на Министерството за внатрешни работи.
Надлежните сè уште трагаат по шести осомничен.
На прес-конференција во Скопје, директорот на Агенцијата, Бојан Христовски, изјави дека членовите на мрежата биле инфилтрирани во „криминалните структури“ во земјата.
Од АНБ наведоа дека планот наводно бил осмислен под раководство на иранскиот државјанин Маванех, кој е идентификуван како лице поврзано со други посредници на иранските безбедносни и разузнавачки служби, вклучително и неговата поврзаност со нарко-босот Наџи Шарифи Зиндашти.
Зиндашти бил клучна фигура во случајот што се однесува на транспортот на два тона хероин на бродот „Нур 1“ (Noor One) во јуни 2014 година.
Во текот на истрагите, на виделина излегоа тајни средби што вклучените лица ги одржувале во трети земји, вклучително и во Иран, а исто така беа потврдени и нивните контакти со ирански државјанин, кој наводно одиграл централна улога во планирањето на нападот, соопштија од АНБ.
(Фото: Ekathimerini)
Аналитика








