СЕ’ ЌЕ ЗАСТАНЕ: Грција се подготвува за комплетна блокада на јавниот живот на втората годишнина од трагедијата во Темби, под мотото: „Немам кислород“

Грчките контролори на летање соопштија дека ќе се приклучат на националниот генерален штрајк, со кој се бара правда за жртвите од железничката катастрофа во Темпи пред две години. Со приклучување на оваа групација уште повеќе се зголеми поддршката за комплетна блокада на јавниот живот во соседна Грција, кој треба да се случи на 28 февруари, кога е втората годишнина од трагедијата во Темби, кога во судир на два воза загинаа 57 луѓе.

Учеството на контролорите на воздухопловството во штрајкот на 28 февруари, повикан од синдикатите кои ги претставуваат работниците од јавниот и приватниот сектор, се очекува да ги приземји сите комерцијални патнички летови кои се упатуваат кон и од грчките аеродроми.

Железничката несреќа во Темби крај Лариса ги откри недостатоците во безбедносната опрема во железничкиот систем на Грција и доведе до оставка на министерот за транспорт. Но, официјалното справување со катастрофата беше критикувано, со гневот на јавноста поради одложувањето на истрагата и наводите за прикривање што владата силно ги негира. Имаше тврдења дека товарниот воз превезувал опасни хемикалии кои се запалиле, предизвикувајќи интензивен пожар во кој загинаа многу од жртвите.

Генералниот штрајк во Грција, организиран преку социјалните мрежи со хаштаг „Немам кислород“ ( Δεν έχω οξυγόνο) предвидува и протестни собири за Темпи во 162 градови во Грција и 48 градови во странство, а списокот постојано се проширува. Во исто време, за петок, 28 февруари, имаше повици за штрајк од најголемите синдикати и работнички конфедерации во земјата, при што присуствуваа работнички, студентски и ученички здруженија за да бараат правдата да биде задоволена.

Слоганот на протестите „Немам кислород“ доаѓа од сведоштвото на една од жртвите на железничката несреќа, која и се јавила на својата пријателка непосредно по сударот и ѝ кажала дека се задушува бидејќи не може да дише. Според неофицијални информации што кружат на социјалните мрежи во Грција, дури 30 од жртвите на несреќата биле живи по сударот, но се задушиле или изгореле во експлозијата која следела по колизијата на двата воза.

Минатиот месец беа одржани масовни протести по повикот на роднините на жртвите на несреќата, од кои многумина беа студенти кои се враќаа на настава по државниот празник.

„КОРУПЦИЈАТА ГИ УБИВА НАШИТЕ ДЕЦА“

Мајката на една од жртвите во несреќата во Темби, Марија Каристијану, чијашто ќерка на изговори реченицата од аудио-снимката што ја потресе Грција, со зборовите: „Немам кислород“ непосредно пред да почине во згмечениот воз, во пресрет на двегодишнината од трагедијата објави јавен повик: „Најмрачната годишнина од нашите животи се приближува. Ноќта кога корупцијата ги уби нашите деца. А за да не биде разоткриена, таа безмилосно продолжува да ги УБИВА, попатно „собирајќи“ се што ќе им ја оправда душата. „28.02.2025 година е ден на сеќавање“, вели Каристијану во својата објава.

Ова се однесува на случајот со Василис Калогиру, синот на грчаката јавна обвинителка која работела на случајот со железничката несреќа од 2023. Грчките медиуми објавија дека Врховниот суд на Грција започна итна истрага за смртта на Василис Калогиру, што означува значителна промена во пристапот по јавните наводи за непристојна игра.

39-годишникот исчезнал кон крајот на декември 2024 година. Како што растеа шпекулациите за неговото исчезнување, се појавија теории на интернет кои сугерираат можна поврзаност со неговата мајка, Апелациската обвинителка во Лариса, Софија Апостолаки, која ја надгледуваше истрагата за смртоносната железничка несреќа во Темпи.

Многу онлајн шпекулации го поврзуваа исчезнувањето на Калогиру со овие обвинувања.

На почетокот на јануари 2025 година, обвинителката на Врховниот суд Џорџија Адеилини и Унијата на грчки јавни обвинители отфрлија каква било поврзаност помеѓу случајот на Калогиру и работата на неговата мајка.

Сепак, оваа недела, телото на Калогиру било откриено на 18 километри од местото каде што исчезнал, во планина и на тешко достапен терен, со повеќе повреди, што предизвикува нова загриженост. Неговата мајка, која првично негираше каква било поврзаност со нејзината судска улога, сега јавно сугерира дека нејзиниот син можеби е убиен.

(Фото: Дојче Веле)