Исплатата на дивидендата за 2022 година ќе започне на 28 септември, ги инфомира своите акционери Македонски телеком АД – Скопје преку ценовно чувствителна информација објавена на Македонска берза.
Притоа е наведено дека е утврден вкупен бруто износ од 1.667.793.739,00 денари (27 милиони евра) или бруто износ од 19,34 денари по акција, „во кој се вклучени сите даноци, каде што е применливо, и кои ќе бидат задржани и платени од бруто дивидендата согласно важечката даночна регулатива во Република Северна Македонија на датумот на исплатата“.
Во соопштението е посочено дека согласно законските прописи во државата, Македонски телеком од бруто износот на дивидендата по акција при исплатата на физичките лица ќе задржи и ќе уплати 10% данок на личен доход, а при исплатата на странските правни лица ќе задржи и ќе уплати 10% данок по задршка.
Дивиденда ќе добијат сите евидентирани во Книгата на акционери со датум 14.07.2023 година.
За граѓаните – акционери е предвидена исплата – за резидентите на трансакциските сметки кои се во евиденцијата на МТ; а новите акционери – резиденти, како и оние кои сакаат исплатата да се изврши на друга сметка, треба да достават податоци најдоцна до 13 септември.
Овој датум важи и за правните лица – резиденти, како и правните и физичките лица – странски резиденти. Покрај податоците за банкарската сметка треба да приложат и „потврда за резидентен статус” заверена од надлежниот даночен орган на странската држава, и тоа најдоцна еден ден пред исплатата на дивидендата. Исто така, странските физички лица треба да достават Единствен даночен број (ЕДБ) за нивна даночна регистрација во земјава, крајно до 13 септември.