Аналитика
Грција започна еден од најамбициозните енергетски проекти во Европа со поврзување на својата електрична мрежа со египетската. Подводниот кабел ќе носи 3.000 MW електрична енергија – доволно за напојување до 450.000 домаќинства – и ќе оди од северен Египет директно до Атика во Грција. Проектот го презема Групацијата Копелузос, чиј менаџмент минатата недела се сретна со египетските лидери за да го забрза процесот.
Како што се зголемуваат цените на нафтата и гасот, Европа се соочува со претстојна енергетска криза. Русија беше најголемиот снабдувач на нафта и гас на блокот во 2021 година обезбедувајќи околу 40 отсто од вкупните потреби за енергија.
Но, по инвазијата на Украина и воведувањето санкции, цените на енергијата се зголемија, оставајќи некои нации несигурни за нивните резерви оваа зима.
„Со носење 3.000 MW чиста енергија во Европа преку Грција, ние и помагаме на Европа да се одвикне од фосилните горива и природниот гас на Русија“, вели Јоанис Каридас, извршен директор на Групацијата Копелузос. „Исто така, зелената енергија што ќе ја транспортираме ќе биде многу поевтина од денешните цени на енергијата. Разбирате дека тоа ќе им помогне и на грчките и на европските потрошувачи“.
„Интерконекцијата GREGY“ треба да чини 3,5 милијарди евра – Европската унија ја прогласи за проект од заеднички интерес (PCI). Ова значи дека е идентификуван како клучен приоритет за меѓусебно поврзување на инфраструктурата на енергетскиот систем на Европската унија.
КАДЕ ЌЕ ОДИ ЕНЕРГИЈАТА?
„Приближно една третина ќе се троши во Грција, а главно во грчките индустрии, друга третина ќе се извезува во соседните европски земји, а остатокот ќе се користи за производство на зелен водород“, вели Каридас. „Поголемиот дел од овој водород ќе се извезува и во соседните европски земји“.
Египет веќе има завршено проекти за интерконекција со Либија, Судан и Саудиска Арабија и се стреми да стане главен енергетски центар за Југоисточна Европа. Се очекува проектот да биде завршен за 7 до 8 години.
