Бродот за превоз на ЛПГ „Гас Хаски“ (GAS HUSKY) денес потона на приближно 50 наутички милји источно од Бјала, јавија бугарските новински агенции. Според информациите, бродот пловел без товар од Александрија, Египет, кон романското пристаниште Мидија. Бугарски воен персонал и воздухоплови учествуваат во операција за пребарување и спасување на екипажот на „GAS HUSKY“, кој потона на приближно 50 наутички милји источно од бугарскиот крајбрежен град Бјала.
Авион „Су-25“ на бугарските воздухопловни сили полетал од Балчик во 10:25 часот за да изврши извидување од воздух над областа. За време на мисијата, во морето бил забележан сплав за спасување со луѓе.
Потоа бил испратен хеликоптер „Кугар“ за спасување на преживеаните. Нешто по 11:00 часот, на местото на настанот бил упатен и втор авион „Су-25“.
Операцијата е започната по наредба на началникот на одбраната на Бугарија и по барање на Дирекцијата за итни и спасувачки активности при Поморската управа, за обезбедување воздухопловна поддршка во напорите за пребарување и спасување.
Бродот „GAS HUSKY“, кој плови под либериско знаме, исчезна од радарите веднаш по полноќ. Во 8:02 часот се активирал неговиот радио-светилник за итни случаи, испраќајќи сигнал кој укажува дека бродот потонал.
Бродот пловел без товар од Александрија, Египет, кон романското пристаниште Мидија. Околу полноќ престанал да се движи, почнал да плови неконтролирано (да лебди по струјата) и престанал да пренесува податоци преку својот Автоматски систем за идентификација (AIS).
Изграден во 2012 година, бродот е долг 119 метри, регистриран е на компанијата „Octopus Gas Inc.“, а со него управува грчката компанија „Stealth Maritime Corp. SA“.
Инцидентот се случува само еден ден откако товарниот брод „BETUL 8“ се преврте во истиот дел од Црното Море, на 16 ноември. Извештаите укажуваа на можен напад со поморски дрон, иако тоа не е официјално потврдено. Сите 12 членови на екипажот на „BETUL 8“ беа спасени.
Нема официјална потврда дека „GAS HUSKY“ бил цел на напад.
(Фото: Gas Husky, BGNES)
Аналитика








