Аналитика
Потенцијалот за понатамошна ескалација на конфликтот на Блискиот Исток ги зголемува ризиците и неизвесноста и може да има значителни економски последици за регионот и пошироко, е ставот на Меѓународниот монетарен фонд, пренесуваат медиумите.
Портпаролот на ММФ, Џули Козак, на брифинг со новинарите изјави дека ММФ внимателно го следи неодамнешното интензивирање на конфликтот во регионот со голема загриженост. „Во однос на најновите случувања, прерано е да се зборува за економските последици, но веќе знаеме дека економиите во центарот на конфликтот, Западниот Брег, Газа, Либан, Израел, се тешко погодени“, рече Козак.
Сепак, портпаролот истакна дека во однос на глобалната економија, главните канали на влијание досега биле преку трошоците за испорака и цените на стоките.
Во однос на второто, тие остануваат под највисоките нивоа од изминатата година, додаде таа.
Портпаролот рече дека во Газа, цивилното население се соочува со тешки социо-економски услови, хуманитарна криза и недоволна испорака на помош со прелиминарни официјални проценки кои укажуваат на пад на БДП од 86 проценти во првата половина на 2024 година.
На Западниот брег, и онака мрачните изгледи дополнително се влошија, а прелиминарните официјални податоци укажуваат на пад на БДП од 25 отсто во првата половина на 2024 година, рече таа.
Во Либан, неодамнешното интензивирање на конфликтот ја влошува и онака кревката макроекономска и социјална ситуација на земјата. Конфликтот нанесе голем човечки жртви на земјата и ја оштети физичката инфраструктура.
БДП на Израел се намали за околу 20 отсто во четвртиот квартал од 2023 година по почетокот на конфликтот, а земјата забележа само делумно закрепнување во првата половина на 2024 година, додаде Козак.
