Аналитика
Кина во понеделникот го отфрли како неодговорно оцрнување предупредувањето од шефот на НАСА дека Кина може да ја „преземе“ Месечината како дел од воената програма, велејќи дека отсекогаш повикувала на изградба на заедница на нации во вселената.
Кина го засили темпото на својата вселенска програма во изминатата деценија, со истражување на Месечината. Кина го направи своето прво лунарно слетување без екипаж во 2013 година и очекува да лансира ракети доволно моќни за да испрати астронаути на Месечината кон крајот на оваа деценија.
„Мора да бидеме многу загрижени што Кина слетува на Месечината и вели: „Сега е наше, а вие останете надвор“, изјави администраторот на НАСА Бил Нелсон за германскиот весник „Билд“ во интервју објавено во саботата. Шефот на американската вселенска агенција рече дека кинеската вселенска програма е воена и дека Кина украла идеи и технологија од други.
„Ова не е прв пат шефот на американската Национална аеронаутичка и вселенска администрација да ги игнорира фактите и да зборува неодговорно за Кина“, изјави Жао Лиџијан, портпарол на кинеското Министерство за надворешни работи „Американската страна постојано конструираше оцрнувачка кампања против нормалните и разумни напори на Кина во вселената, а Кина цврсто се спротивставува на таквите неодговорни забелешки“.
Кина отсекогаш промовираше градење на заедничка иднина за човештвото во вселената и се спротивстави на нејзиното вооружување и каква било трка во вооружување во вселената, рече тој.
НАСА, во рамките на својата програма Артемис, планира да испрати мисија со екипаж да орбитира околу Месечината во 2024 година и да изврши слетување со екипаж во близина на лунарниот јужен пол до 2025 година.
Кина планира да испрати мисии без екипаж во јужниот пол на Месечината во текот на оваа деценија.
